तीन महिने आधारभूत सिलाई कटाई तालिम सम्पन्न

पहुरा समाचारदाता
हसुलिया, ६ जेठ । कैलारी गाउँपालिकाके वडा नम्बर ४ के ‘गाउँ’मे हुइल तीन महिने आधारभूत सिलाई कटाई तालिम सम्पन्न हुइल बा ।

गाउँपालिका उपाध्यक्ष भगवतीकुमारी चौधरीके बरका पहुनामे हुइल समापन कार्यक्रममे उहाँ सिलाई कटाई सिखके अपने व्यवसाय संचालन करे सेक्लेसे अपने गाउँठाउमे बैठके काम करेसेक्ना, रोजगारीके लाग कहु जाई नैपर्ना ओ एक दुई रुप्याके लाग कहु हात जोरे नइपरी, मजा कमाही करे सेक्ना बटैली ।

महिलाहुकनके श्रमके मुल्यांकन नइरहल कहटी आब अपने व्यवसाय संचालन करके प्रगती करे सेक्ना बटैली । तालिममे भौतिक पूर्वाधार विकास समिति संयोजक प्रेमबहादुर चौधरी, कार्यपालिका सदस्य लालबहादुर विक, वडा सदस्य सुवा परियार लगायत मन्तव्य राखल रहिट ।

कैलारी गाउँपालिका वडा नम्बर ४ के वडा अध्यक्ष ठागुराम चौधरीके अध्यक्षतामे हुइल कार्यक्रममे स्वागत मन्तव्य सहास नेपालके कार्यक्र अधिकृत नरेश चौधरी करल रहिट । कैलारी गाउँपालिका वडा नम्बर ४ आयोजना ओ सहास नेपालके सहकार्यमे ‘सीप सिखौ आत्मनिर्भर बनौ’ कना नाराके साथ लक्षित वर्ग कार्यक्रम अन्र्तगत दलित महिलाहुकनके उत्थानके लाग तीन महिना आधारभूत सिलाई कटाई तालिम चैत ६ गतेसे असार ५ गतेसम संचालन हुइल रहे ।

तालिमके लाग वडा नम्बर ४ से २ लाख ५० हजार ओ सहास नेपालसे ९० हजार बजेट विनियोजन करल रहे सहभागिनहे मेशिनफे प्रदान कैगिल बा । तालिमम समापन कार्यक्रममे वडा सदस्य लक्ष्मी चौधरी, हरिद्वारी चौधरी, मोहनलाल चौधरी, कैलारी गाउँपालिकाके स्वास्थ्य शाखा प्रमुख नरेशकुमार चौधरी, योजना शाखा प्रमुख सन्तोषकुमार चौधरी, अस्सिटेन्ट सबइन्जिनियर रविशंकर चौधरी, रन्जित कठरिया, वडा कार्यालयके कर्मचारीलगायत सहभागिता रहे । तालिममे १७ जाने सिलाई कटाईके प्रशिक्षर्थाी सहभागी रहिट कलेसे प्रशिक्षण लक्ष्मी चौधरी डेहल रहिट ।