बाज लाग्के दुईके मृत्यु, चारजे घाहिल
पहुरा समाचारदाता
धनगढी, १२ असार । कैलालीके जोशीपुरमे बाज (चट्याङ) लागके दुई जहनके मृत्यु हुइल बा । जोशीपुर गाउँपालिका–३, भितरीयाके वर्ष ३२ वर्षीय जयराम डंगौराके ज्यान गैल बा । अस्टेक, धनगढी उपमहानगरपालिका वडा नम्बर १८ के २५ वर्षीय शालिम चौधरीके मुत्यु हुइल बा ।
बिहान करिब ७ः३० बजेके समयमे घरसे ३ सय मिटर पूर्व अपन खेतमे काम करना क्रममे बाज लागके घाहिल हुइल डंगौराके स्थानीय मेडिकल महापार्वती मेडिकलमे उपचारके क्रममे मृत्यु हुइल इलाका प्रहरी कार्यालय जोशीपुर जनैले बा ।
अस्टेक जिल्लाके भजनी नगरपालिका–६, महादेउलीके ५५ वर्षीय रामबहादुर चौधरी बाजमे परके घाहिल हुइल बटैं । उहाँक दाहिन हातमे चट्याङ लाग्के जरल बा । उहाँहे उपचारके लाग धनगढी रेफर करल प्रहरी जनैले बा ।
अस्टेक विद्यालय जैना क्रममे जिल्लाके घोडाघोडी नगरपालिका–९, बुदेनीके ३ बालिका गम्भीर घाहिल हुइल बटैं । इलाका प्रहरी सुखडके प्रहरी नायव उपरीक्षक दीपेन्द्र पालके अनुसार घाहिल हुइनामे ९ वर्षीय सरस्वती भुल, ७ वर्षीय पारु कठायत ओ १० वर्षीय खिमा कठायत रहल बटैं । उहाँहुक्रे अध्ययनरत मोहन्याम आधारभूत विद्यालय बुदेनीके गेटमे पुग्ना क्रममे बाज लागल रहे ।
गम्भीर घाहिल बालिका एक बालिकाके बाज लागके आन्द्रा बाहेर निकरल बा कलेसे दुई बालिकाके कपारमे चोट लागल प्रहरी नायव उपरीक्षक पाल बटैलैं ।
उपचारके लाग घोडाघोडी अस्पताल लैगिल ओइनहे थप उपचारके लाग बाँकेके नेपालजंग मेडिकल कलेज कोहलपुर रेफर करल बा ।
