बाढसे कैलारी–७ के १४ घर डुबानमे
पहुरा समाचारदाता
धनगढी, १९ असार । मंगरके रातसे आइल बाढसे कैलाली जिल्लाके कैलारी गाउँपालिका वडा नम्बर ७ स्थित छटकपुर बसन्ताके १४ घर डुबानमे परल बा ।
कटैनी लडियक पानी छलकलपाछे कैलारी गाउँपालिका वडा नम्बर ७ स्थित छटकपुर बसन्ताके १४ घरमे पानी पेलल बा । छटकपुर बसन्ताके श्यामलाल विक, दिलबहादुर विक, प्रेमी चौधरी, नागेश चौधरी, नविन चौधरी, सीताराम चौधरी, लिलाम्बर चौधरी, विष्णु प्रसाद चौधरीके घर डुबानमे परल कैलारी गाउँपालिका विपद व्यवस्थापन शाखाके फोकल पर्सन भुवन चौधरी बटैलै ।
ओस्टेक करके आर्यन चौधरी, बुधराम चौधरी, गणेश चौधरी, मञ्जु चौधरी, विरबहादुर चौधरी ओ रञ्जु चौधरीके घरफे डुबानमे परल उहाँ बटैलै । कटैनी लडिया उपटके वडा नम्बर ७ अन्र्तत बरका बसन्ता, भुइयाँफाँटा, रामपुर, तिघरी गाउँ, कैलारी–५ के बैसपुर, मन्कापुर गाउँमेफे पानी पेलल बा । कलेसे मोहना लडियामे बाढसे कैलारी–३ के खोनपुर, शिवरत्नापुर, लालपुरमे भुभाग डुबानमे परल बा ।
बाढ प्रभावित क्षेत्रके अनुगमन
कैलारी गाउँपालिका अध्यक्ष राजसमझ चौधरीके नेतृत्वमे बाढ प्रभावित क्षेत्रके अनुगमन कैगिल बा ।
कैलारी–७ छटकपुर बसन्तामे स्थानीयहुकनके घर डुबानमे परलपाछे गाउँपालिका अध्यक्ष, कैलारी गाउँपापालिकाके प्रवक्ता तथा वडा नम्बर ७ के अध्यक्ष दिपेन्द्रबहादुर बम, वडा नम्बर ३ के वडा अध्यक्ष सन्तराम चौधरी, कार्यपालिका सदस्य सुन्दरी चौधरी, प्रमुख प्रशासकीय अधिकृत खगेन्द्रराज जोशी, सामाजिक विकास शाखा प्रमुख यगम कलेल, विपद व्यवस्थापन फोकल पर्सन भुवन चौधरी, आइटी शाखा प्रमुख रबिन्द्र चौधरीलगायतसे बाढ प्रभावित क्षेत्रके स्थलगत अनुगमन करल रहिट । अनुगमनपाछे बाढ पेल्के क्षति पुगल घरपरिवारहे राहतके व्यवस्था कैना गाउँपालिका अध्यक्ष राजसमझ चौधरी निर्देशन डेहल रहिट ।
बाढ पीडित परिवारहे राहत वितरण
कटैनी लडियाके पानी उपट बाढ पेलल छटकपुर बसन्ताके १४ घर परिवारहे राहत वितरण कैगिल बा ।
बाढ पेल्के क्षति पुगल घर परिवारहे कैलारी गाउँपालिकाके सहयोगमे राहत वितरण करल हो । बाढ पीडितहुकनके चिउरा, चाउचाउ,पानी, साबुन, सर्फ हस्तान्तरण कैगिल बा । राहत वितरण कैलारी गाउँपालिका वडा नम्बर ७ के वडा सदस्य टुनीराम चौधरी, विपद व्यवस्थापन शाखाके विपद फोकल पर्सन भुवन चौधरी, योजना शाखा प्रमुख सन्तोषकुमार चौधरी लगायतके सहभागिता रहल रहे ।
पुलसे गिरके बालिकाके मृत्यु
कैलालीके गौरीगंगा नगरपालिकामे काठेपुलके सहायतासे खोलुवा नाघ्ना क्रममे बिछुलके गिरलपाछे बुधके बालिकाके मृत्यु हुइल बा ।
गौरीगंगा नगरपालिका ११ कान्तिपुरके १६ वर्षीया सुमित्रा चौधरीके काठेपुलसे खोलुवा नाघ्ना क्रममे बिछुलके लडियामे गिरके मृत्यु हुइल इलाका प्रहरी कार्यालय मसुरियाके इन्चार्ज प्रहरी वरिष्ठ नायव निरीक्षक नरेशकुमार ढकाल जानकारी डेलै ।
ऐँठा ओ कान्तिपुर जोर्ना कटैनी लडियामे बनल काठेपुलके सहायता स्थानीय ओहोर दोहोर कैना करल जनाइल बा । मंगरके रात हुइल अविरल वर्षाके कारण लडियामे पानीके बहाव बह्रलपाछे काठेपुल उप्परसे पानी बहल ओ खतरा मोल्टी लडिया लडिया नाघ्ना क्रममे किनार पुगल अवस्थामे बिछुलके लडियामे गिरल जनाइल बा ।
सुरक्षाकर्मी ओ स्थानीयके सहयोगमे खोजीकार्य करेबर करिब पाँच घण्टापाछे मृतक चौधरीके शव फेला परल इन्चार्ज ढकाल जनैले बा ।
कक्षा ८ मे अध्ययनरत चौधरीके दुःखद निधनपाछे सरकारसे झोलुङगे पुल नैबना डेहलपाछे जोखिम मोल्टी लडिया नाघ्ना बाध्य रहल स्थानीयहुक्रे गुनासो करले बाटै ।
धनगढीके शिवनगर क्षेत्र डुवानमे
धनगढी उपमहानगरपालिका वडा नं १ मे शिवनगर खोलुवाके बाढ बस्तीमे पैँठलपाछे शिवनगर क्षेत्र डुवानमे परल बा ।
शिवनगरके खानेपानी क्षेत्र, न्यरोड क्षेत्रके दर्जानौ घरमे पानी पैँठल बा । बाढ घर भिट्टर पैँठेबर खाद्यान्न, लुगाकपडा भिजल बा । बुधके दिनके १ बजे ओर खोलुवा धार परिवर्तन हुइल रहे ।
बस्तीमे बाढ पैँठेबर निकासके लाग प्रयास हुइल नैहो । धनगढी उपमहानगरपालिका वडा नं १ के स्थानीय काशीनाथ जोशी खोलुवाके पानीसे बस्तीमे डुवान बह्रटी गैल बटैलै । खोलुवाके पानीसे बस्ती जलमग्न हुइल बावै जोशी कहलै, ‘खोलुवाहे पुराने अवस्थामे नैफर्कैलेसे आउर क्षति पुग्ना डेखजाइठ् ।’ बाढसे डेढसयसे ढेर घरहे डुवानमे परले बा ।
बस्ती डुवान हुइलेसे धनगढी उपमहानगरपालिका चाँसो नैडेहल गुनासो स्थानीय करले बाटै । नालामे पानी भरके उत्तर ओर बहे लागल बा, स्थानीय मिन भट्ट कहलै, बस्ती डुवान हुइना मेरके बनाइल नालीसे डुवानमे सहयोग पुगल बा । धनगढी उपमहानगरपालिकाके इन्जिनीयर दाताराम जोशी खोलुवा अवरुद्ध हुइलपाछे धार बस्तीमे पैँठल बटैलै । उहाँ कहलै, उपमहानगरपालिकासे खोलुवाके अवरोध खुलैना जेसिवि प्रयोग करल बटैलै ।
बाढसे पुल पुहाइलपाछे समस्या
मंगरके परल अविरल वर्षाके कारण खोलुवामे आइल बाढसे काठे पुल पुहाइबर आवतजावतमे समस्या हुइल बा ।
कैलालीके घोडाघोडी नगरपालिकामे बौराहा खोलुवामे आइल बाढ ओ कौवा खोलुवामे आइल बाढसे काठेपुल पुहैले बा । घोडाघोडी नगरपालिका वडा नम्बर ८ तारानगर स्थित काठे पुल पुहाइबर विद्यालय जउइया बालबालिका विद्यालय जैनासे वञ्चित रहल वडा नम्बर ८ के वडाध्यक्ष वीरबहादुर साउँद जानकारी डेलै । उहाँ कहलै, “मै फेन सकारे पुल पुहाइल स्थानमे पुगके अइनु । विद्यालय जउइया विद्यार्थी पुल पुहाइलपाछे विद्यालय घुमाहुर डगरा साँडेपानी ओ बेलकोट हुइटी जाइ परल बा । तारानगर, तिलकेनी, जरै, बछुरियाके स्थानाथीहे समस्या हुइल बा ।”
लडियाके उपार राष्ट्रिय माध्यमिक विद्यालय तारानगर रहल बा । पुल नाघके विद्यालय जउइया विद्यार्थी बाढसे पुल पुहाइलपाछे त्रैमासिक परीक्षा चल्टी रहल ओरसे विद्यालयमे बुधके परीक्षा डेहे घुमाहुर डगरा प्रयोग कैके जैना बाध्य रहल जनाइल बा ।
ओस्टके वडा नम्बर ५ ओ ७ जोर्ना चोंगालीपुर ओ राजीपुर बिचके काठे पुल पहुाइल कारण दरख माध्यमिक विद्यालय हरी नगर पहे्रे अउइया विद्यार्थी विद्यालय अइनासे वञ्चित हुइल विद्यालयके शिक्षक दिनेशकुमार लामिछाने बटैलै । परीक्षा चलल् कारण पाँच किलोमिटर घुमके विद्यालय अइना बाध्य हुइल जनाइल बा ।
बाढसे डुनु काठेपुल क्षतिके साथे पुहाइल खोलुवामे पक्कीपुल निर्माणाधीन अवस्थामे रहल जनाइल बा । पक्कीपुल निर्माण कार्य ढिलासुस्तीके कारण स्थानीये सास्ती खेपे परल जनाइल बा ।
मंगर रात हुइल वर्षाके कारण कान्द्रा लडियामे पानीके सतह सतर्कता तह पार करल जल मापन केन्द्र डेखैले बा । कान्द्रा लडियाके बाढ पैँठलपाछे वडा नम्बर ५ के फारम सरैया गाउँके स्थानीयहे सुरक्षित रहना सचेत करल वडाध्यक्ष लोकबहादुर शाह बटैलै ।
