बाढसे बस्ती डुबलपाछे कैलाली ओ कञ्चनपुरके ६ सय ढेर परिवारहे सुरक्षित ठाउँमे सारगिल
पहुरा समाचारदाता
धनगढी, २४ असार । बाढसे बस्ती डुबलपाछे कैलाली ओ कञ्चनपुरके ६ सय ढेर परिवारहे सुरक्षित ठाउँमे सारगिल बा ।
सुदूरपश्चिमके प्रमुख प्रहरी नायब महानिरीक्षक(डीआईजी) रबिन्द्र केसी दुनु जिल्लाके ६ सय ढेर परिवारके दुई हजार ढेर जनहनहे सामुदायिक विद्यालय ओ सामुदायिक भवनमे सारल बटैले बटै ।
अभिनसम कञ्चनपुरमे घरभिटर जमल पानीमे डुबके ७ महिनाके बच्चाके मृत्यु तथा कैलाली ओ कञ्चनपुरमे लडियामे डुबके दुई जाने बेपत्ता हुइल बाहेक थप मानवीय क्षति नइहुइल प्रदेश प्रहरी कार्यालय जनैले बा ।
जिल्ला प्रहरी कार्यालय कैलालीके प्रमुख प्रहरी उपरीक्षक(एसपी) पदमबहादुर बिष्ट कान्द्रा ओ काडा लडियाके कारण भजनी नगरपालिका ओ जोशीपुर गाउँपालिका क्षेत्र डुबानमे परल जानकारी डेलै । कटैनी लडियाके कारण कैलारी गाउँपालिकाके वडा नम्बर ५ लगायत टमान वडामे डुबानमे परल बा ।
उहाँक अनुसार भजनी नगरपालिकाका वडा नम्बर ५ ओ ७, जोशीपुर गाउँपालिकाका वडा नम्बर ३ ओ ८ तथा टीकापुर नगरपालिकाके वडा नम्बर ६ बाढ ओ डुबानके कारण प्रभावित हुइल बटै ।
धनगढी उपमहानगरपालिकाके वडा नम्बर १८ ओ १९ तथा गौरीगंगा नगरपालिकाके कुछ वडा समेत डुबानमे परल बटै । उ ठाउँमेफे रातसे उद्धारके कार्य जारी रहल एसपी विष्ट बटैलै ।
