थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ०२ सावन २६४८, बुध ]
[ वि.सं २ श्रावण २०८१, बुधबार ]
[ 17 Jul 2024, Wednesday ]

सामुदायिक विद्यालयमे बोटबिरुवा लगैटी

पहुरा | २६ असार २०८१, बुधबार
सामुदायिक विद्यालयमे बोटबिरुवा लगैटी

पहुरा समाचारदाता
धनगढी, २६ असार ।
धनगढी उपमहानगरपालिकासे सामुदायिक विद्यालयमे फलफूलके बोटबिरुवा लगैना अभियान सुरु करले बा ।

उपमहानगरसे “विद्यालय फलफूल संरक्षण प्रवर्द्धन कार्यक्रम” अन्तर्गत इ बरस ५१ सामुदायिक विद्यालयमे बिरुवा लगैना सुरू करल हो । मंगरसे बिरुवा लगाइ लागल हो ।

मंगरके १६ सामुदायिक विद्यालयमे एक हजार ५२५ बिरुवा लगाइल नगर प्रमुख गोपाल हमाल बटैलै । उपमहानगरसे शिक्षा महाशाखाके प्राविधिक सहायक केशव खत्रीहे सामुदायिक विद्यालयमे बिरुवा लगैना कार्यक्रमके जिम्मेवारी डेहल बा । जौन अनुसार धनगढीके ६८ सामुदायिक विद्यालय मध्ये पर्खाल रहल ५१ विद्यालयमे कत्रा बिरुवा लगाइ सेकजाइ कहिके स्टिमेट निकारके विद्यालयहे फलफूलके बिरुवा वितरण करे लागल हो ।

धनगढी उपमहानगरपालिकासे सामुदायिक विद्यालयमे आम, अम्रुट ओ लिचीके बिरुवा वितरण करले बा । विद्यालयमे बिरुवा लगाके संरक्षण कैना सजिल हुइना ओ फरे लागलपाछे बालबालिकाहे खाइ डेना उद्देश्यसे फलफूलके बिरुवा लगैना योजना बानाइल नगर प्रमुख गोपाल हमाल बटैलै । पर्यावरणके संरक्षण कैना ओ बालबालिकाहे खाइ डेना हिसाबसे फलफूल लगाइ लागल नगर प्रमुख हमाल बटैलै ।

“पर्यावरणके संरक्षण ओ बालबालिका फल खाइ सेकिट्, रुख्वामे चह्रके रमाइ सेकिट कहिके फलफूलके बिरुवा लगाइ लागल होे,” उहाँ कहलै, “विद्यालयसे फलफूल बिक्री कैके आम्दानी कहिके फेन लगाइ लागल हो । विद्यार्थी ओ पर्यावरणके लाग फलफूलके बिरुवा लगाइ लागल हो ।”

विद्यार्थीहुक्रे विद्यालयमे पह्रटी मौसमअनुसार पक्ना फलफूल टुरके खाइ पैना कहिके हरेक विद्यालयमे जग्गाके क्षेत्रफलके आधारमे आम ओ अम्रुटके बिरुवा वितरण कैना कार्यक्रम संयोजक केशव खत्री बटैलै ।

विद्यालयमे लगाइल बिरुवा बह्रैना पौह्ैना विद्यालयसे विद्यार्थीहे जिम्मेवारी डेना बटाइल बा । लगाइल विरुवामे पानी डर्ना, गोडमेल ओ संरक्षण कैना दायित्व इको क्लबके विद्यार्थीके जिम्मा लगाके हरेक बिरुवाके संरक्षण कैना हुइल बा । बिरुवाके हेरचाह कैना विद्यार्थीहे जिम्मा डेना पञ्चोदय माध्यमिक विद्यालयके प्रधानाध्यापक हरिशकुमार ओझा बटैलै । उहाँ विद्यार्थीहुक्रनहे प्रत्येक बोटके जिम्मेवारी डेहेबर बिरुवा संरक्षण हुइना बटैले बाटै ।

नगर प्रमुख हमाल विद्यालयके आम्दानी बह्रैना बिरुवा फरे लागलपाछे ठेक्कामे लगैना ओ बिक्री कैना बटैलै । उहाँ विद्यार्थीहुक्रे फलफूल टुरके खाइ सेकिट कहिके फलफूलके बिरुवा लगैना अभियान चलाइल स्पष्ट परले बाटै ।

ओस्टके, धनगढी–१६ बेहडाबाबा माध्यमिक विद्यालयके प्रधानाध्यापक भोजराज शर्मा विद्यालयमे ६५ बिरुवा आम ओ १५ बिरुवा अम्रुटके लगाइल बटैले बाटै । उहाँ बिरुवा फल डेहे लागलपाछे बालबालिकाहे नै दिवा खाजाके रुपमे फलफूल खाइ डेना व्यवस्था मिलैना बटैले बाटै ।

बिरुवा लगैना किल बरवार बात नैहोके ओकर संरक्षण कैना महत्त्वपूर्ण रहल नगर प्रमुख हमाल बटैले बाटै । विद्यालय तथा अन्य सार्वजनिक ठाउँमे लगाइल बिरुवाके संरक्षण कैना सक्कु जाने लागे पर्ना बटैले बाटै । उहाँ उपमहानगरपालिकासे बिरुवा लगैना किल नैहोके ओकर संरक्षणमे समेत ध्यान डेहल बटैलै ।

जनाअवजको टिप्पणीहरू