नगरबस सेवा सञ्चालन करटि उपमहानगर

पहुरा समाचारदाता
धनगढी, २ सावन । कैलालीके धनगढी उपमहानगरपालिका नगरबस सेवा सञ्चालन करना हुइल बा । उपमहानगरपालिका नगरबस सेवा सञ्चालनके लाग ६ ठो बस खरिद करले बा ।

सुदूरपश्चिम प्रदेशके राजधानी तथा प्रदेशके एक ठो किल उपमहानगरपालिका रहल धनगढीसे नगरबस सेवा सञ्चालनके लाग दुई करोड ४८ लाखमे ३२ सिटे ६ ठो बस खरिद कैके नान्सेकल उपमहानगरपालिकाके मेकानिकल सव इन्जिनियर ओम बुढा बटैलैं ।

उहाँ फूलबारी–धनगढी–चौराहा–सहिदगेट–क्याम्पस रोड हुइटि पुनः फूलबारीसम सार्वजनिक यातायातके रुपमे नगर बस चलैना रुट तयार करल जानकारी डेलैं । नगर बस सेवा सञ्चालनके लाग उपमहानगरपालिका ठेक्का सम्झौता करना इच्छुक कम्पनी तथा फर्महे ३० दिने बोलपत्र समेत आह्वान करले बा । मंगरके रोज सूचना जारी करटि उपमहानगरपालिका ६ ठो बसहे १० वर्षसमके लाग बस सेवा सञ्चालनके लाग ठेक्का लगैना उल्लेख करल बा ।

जारी सूचनामे मूल्य अभिवृद्धि कर बाहेक २१ लाख ६० हजार रुपैयाँ ठेक्का न्यूनतम अंक रहल बा । प्रत्येक वर्ष बोलपत्रदाता कबोल करल ठेक्का रकम बराबरके रकम तीन किस्तामे उपमहानगरपालिकाहे तिरे परि ।

पहिल किस्ताके रकम सम्झौता करे डेना अग्रिम बुझाइपरना, बाँकी दुई किस्ता अगहन ओ चैतभित्रे बुझाइपरना उपमहानगरपालिका जनाइल बा । बसके मर्मत सम्भार, इन्धन, चालक, सहचालक लगायतके खर्च ठेक्का लेना पक्ष तिरेपरना, तोकल स्थान वा रुटबाहेक सञ्चालन करे नैपैना जारी सूचनामे उल्लेख करल बा ।