सुदूरपश्चिमके मुख्यमन्त्री ओ मन्त्रीहुँक्रे शपथ लेलै
पहुरा समाचारदाता
धनगढी, २१ सावन । सुदूरपश्चिमके नवनियुक्त मुख्यमन्त्री कमलबहादुर शाह ओ मन्त्रीहुँक्र सोम्मारके रोज पद तथा गोपनीयताके शपथ लेले बटै ।
प्रदेश प्रमुखके कार्यालयमे दुपहर आयोजना कैगिलक विशेष समारोहके बीच शाह प्रदेश प्रमुख नजिर मियाँसे पद तथा गोपनियताके शपथ लेहल हुइट । शाहहे अँटवार प्रदेश प्रमुखसे संविधानके धारा १६८ के उपधारा (२) अनुसार मुख्यमन्त्रीमे नियुक्त करल रहे ।
मुख्यमन्त्री सपथ लेहलपाछे सुदूरपश्चिमके नवनियुक्त मन्त्री ओ राज्यमन्त्रीहुँक्रेफे पद तथा गोपनीयताके शपथ लेले बटै । उ विशेष समारोहमे ७ जाने मन्त्रीहुँक्रे प्रदेश प्रमुख नजिर मियाँसे ओ ३ राज्यमन्त्रीहुँक्रे मुख्यमन्त्री कमलबहादुर शाहसे पद तथा गोपनियताक शपथ लेहल रहिट ।
मुख्यमन्त्री शाहसे विस्तार कैलक मन्त्री मण्डलमे भौतिक पूर्वाधार विकास मन्त्रीमे सुरेन्द्रबहादुर पाल, भूमि व्यवस्था कृषि तथा सहकारी मन्त्रीमे वीरबहादुर थापा, आन्तरिक मामिला तथा कानून मन्त्रीमे हीरा सार्की, सामाजिक विकास मन्त्रीमे मेघराज खडका, आर्थिक मामिला मन्त्रीमे बहादुर सिंह थापा, उद्योग पर्यटन वन तथा वातावरण मन्त्रीमे लक्ष्मण किशोर चौधरी रहल बटै ।
वसहेक कैके राज्यमन्त्रीमे सरस्वती खड्का सामाजिक विकास मन्त्रालय, प्रकाशबहादुर बम आर्थिक मामिला मन्त्रालय ओ निर्मला साउद भौतिक पूर्वाधार विकास मन्त्रलाय रहल बटै ।
