मुख्यमन्त्री शाह करलै तीन महत्वपूर्ण निर्णय
पहुरा समाचारदाता
धनगढी, २१ सावन । सुदूरपश्चिम प्रदेश सरकारके मुख्यमन्त्री कमल बहादुर शाह पदभार ग्रहण करटी तीन महत्वपूर्ण निर्णय करले बटै ।
सुदूरपश्चिम प्रदेश मातहतके सक्कु मन्त्रालय, आयोग, सचिवालय, निकाय ओ मातहत कार्यालयमे वित्तीय अनुशासन ओ सुशासन प्रवर्द्धन, भ्रष्टाचार न्यूनीकरणके विषयके अध्ययन करके १५ (पन्ध्र) दिनभिटर प्रतिवेदन पेश कैना प्रयोजनार्थ देहायबमोजिमके कार्यदल गठन कैना कहल बा ।
प्रदेश सचिव (शासकीय सुधार तथा समन्वय महाशाखा), मुख्यमन्त्री तथा मन्त्रिपरिषद्के कार्यालय संयोजक, प्रदेश सचिव सक्कु मन्त्रालय सदस्य, सचिव प्रदेश नीति तथा योजना आयोग सदस्य रना बा ।
उपचारके लाग अस्पतालमे अइना विरामीहे आवश्यक पर्ना रगतके अभावमे रगत खोज्टी भौतारे पर्ना अवस्थाके अन्त्य करटी सुदूरपश्चिम प्रदेश मातहतके सक्कु सरकारी अस्पतालमे नेपाल रेडक्रस सोसाइटीके सहकार्यमे निःशुल्क ब्लड बैंक संचालन तथा व्यवस्थापन कैना विषयमे अध्ययन करके ओकर कार्यान्वयनके सम्बन्धमे आवश्यक निर्णय कैना सामाजिक विकास मन्त्रालयहे निर्देशन डेना कहल बा ।
ओस्टेक करके सुदूरपश्चिम प्रदेशमे स्थायी बसोवास रहल ओ अन्य प्रदेशमे स्थायी बसोवास हुके, सुदूरपश्चिम प्रदेशभिटरके सरकारी वा गैरसरकारी क्षेत्रमे कार्यरत नेपाली नागरिकके प्राकृतिक विपद्के कारणसे हुइना मानवीय क्षतिहे सम्बोधन कैना विपद् जोखिम दुर्घटना बिमा कार्यक्रम सञ्चालन करेक लाग अध्ययन करके ओकर सम्बन्धमे आवश्यक निर्णय कैना आन्तरिक मामिला तथा कानून मन्त्रालयहे निर्देशन डेना निर्णय करले बटै ।
