गुरही अस्रैना कार्यक्रमके तयारी पुरा

पहुरा समाचारदाता
धनगढी, २३ सावन । पश्चिमा थारु समुदायसे मनाजिना गुरही अस्रैना टिहुवार कैलाली जिल्लाके धनगढी उपमहानगरपालिका वडा नम्बर ८ गुरही चोकमे भव्यताके साथ मनाइक लाग तयारी पुरा कैगिल बा ।

बुधके रोज आयोजक संस्थाहुँक्रे धनगढीमे पत्रकार सम्मेलनके आयोजना कैके तयारी पुरा हुइल जानकारी डेले बटै । धनगढीके गुरही चोकमे विगत १५ बरससे सामुहिक रुपमे मनैटी आइल गुरही टिहुवार यी बरस फरक तरिकाले मनाइल लागल बाचचित घर धनगढीके बरघरिया ठाकुरप्रसाद करियाप्रधान जानकारी डेलै ।

थारु समुदायके मनैनमे ढेर सिकलसेल एनिमिया रोग डेखा पर्ना ओ रगतके कमी हुइना वरसे यी बरस गुरही टिहुवारके अवसरमे वृहत रक्तदान कार्यक्रमके आयोजना करल उहाँ जानकारी डेलै । आज (विफेक) सकारे सात बजेसे १२ बजेसम रक्तदान कार्यक्रम कैना, सावन २५ गते गुरही चोकमे गुरही अस्रैना ओ सांस्कृतिक कार्यक्रमके आयोजना कैलक उहाँ जानकारी डेलै ।

राष्ट्रिय थारु कलाकार मञ्च प्रदेश समितिके कोषाध्यक्ष राजु चौधरी कार्यक्रमके बारेमे जानकारी डेहल रहिट । गुरही टिहुवारहे भव्य बनाइक लाग सखि संजाल कैलाली, थारु कल्याणकरिणी सभा धनगढी नगरपालिका समिति, राष्ट्रिय थारु कलाकार मञ्च प्रदेश समिति, थारु महिला सभा कैलाली, थारु महिला सञ्जाल, थारु विद्यार्थी समाज, थारु लेखक संघ, हिरगर साहित्य बगाल, बाचचित घर धनगढी, हमार फाउन्डेसन धनगढी ओ थारु नागरिक समाजलगायत संघसंस्था संयोजन करल जनैलै ।

संखी संजाल कैलालीके कार्यवाहक संयोजक उन्नती चौधरीके घरगोस्यामे हुइल पत्रकार सम्मेलनमे उहाँ प्रसासन कार्यालय, प्रहरी कार्यालय, ट्राफिक कार्यालयलगायत टमान निकायमे पत्रचार कैसेकल जानकारी डेली । गुरही अस्रैना टिहुवारहे व्यवस्थित बनाइक लाग नेपाली प्रहरी ओ ट्राफिक प्रहरीसेफे सहयोग कैना प्रतिवद्धता आइल उहाँ बटैली । थारु समुदायसे गुरही टिहुवार धुमधामक साथ मनैना करल ओरसे प्रदेश सरकार ओ स्थानीय सरकारसे सार्वजनिक विदाके माग समेट करल उहाँ बटैली ।

गुरही अवलोकनके लाग दशौं हजार मनैनके उपस्थिति रना ओ भीडहे व्यवस्थित बनाइक यी बरस एक सय जाने स्वयं सेवक परिचालनके तयारी करल थारु कल्याणकारिणी सभा कैलालीके निवर्तमान कार्यवाहक सभापति माधव चौधरी बटैलै । उहाँ कहलै, ‘गैल बरस ५० जाने स्वय सेवक खटगिल रहे । गैल बरससे आउर व्यवस्थित बनाइक लाग यी बरस आउर ढेर यूवाहुकनके स्वयं सेवकक रुपमे परिचालन कैना तयारी करल बा ।’

सामुहिक गुरही टिहुवार मनजाइक लाग कैलालीके १३ स्थानीयतह मध्ये ११ स्थानीय तहमे भव्य तयारी कैगिल बा ।
गुरही थारु समुदायके महान टिहुवार हो । यी पर्वमे रोगव्याधीहे निर्मुल कैना तथा नाकारात्मक सोचहे प्रराष्ट करके नविनतम ओ सकारात्मक सोच विजारोपन कैना टिहुवाके रुपमे लेना करजाइठ ।

विशेष कैके गुरहीू एक प्रकारके किराके नाम हो । यी किराहे नेपाली भाषामे गाईनेकिरा कहिजाइठ । गर्मीयाममे गाउँघरमे व्याप्त दुषित किटाणु तथा मच्छरहे अपन आहारा बनाके यी किरासे वातावरण सरसफाईमे टेवा पुगाइल रहठ । यिहे गुरहीके प्रतिकके रुपमे गाउँघरके लउण्डी लुगराके गुरहीहे बनाके गाउँके दक्षिण पट्टिके चौक चौराहामे अस्रैना करठै, लउण्डा अस्राइल गुरहीहे सोटाले पिट्न ओ ‘गाउँ भरिक रोग व्याध, नैमजा चिज लैजा’ कहिके जोरजोरसे चिल्लैना प्रचलन रहल बा ।

गुरही अस्रासेकलपाछे गुरहीसँग नानल गुडाभुजा एक आपसमे बाँटके खैना खवैना चलन बा । आजकाल्ह थारु कला संस्कृतिके जर्गेनाके लाग संस्कृतिक नाँचगान कैके रहरंगी कैना प्रचलनफे बा । यी टिहुवारहे जनस्वास्थ्यसँगफे जोरके हेरे सेक्जाइठ ।