रानाथारु समुदाय मनैलै तिज पर्व
पहुरा समाचारदाता
धनगढी, २३ सावन । आपन डाडाभैया ओ भटिज्वाके नम्मा आयुके कामना कैटी रानाथारु समुदायके महिलाहुँक्रे तिज पर्व मनैले बटै ।
सावन शुक्ल तृतीयके दिन कैलाली ओ कञ्चनपुरमे बसोबास कैना रानाथारु समुदायसे तिज पर्व मनाइल हुइट । रानाथारु समुदायके महिला आपन डाडाभैया ओ भटिज्वाके दीर्घायुक कामना कैटी निरहर व्रत बैठके तीज पर्व मनाइल रानाथारु समुदायके बृद्धिजिवी नन्दलाल रानाथारु बटैलै । रानाथारु समुदायके बसोबास रहल गाउँके टोलमे सावनके डोला (बल्का) डारल बा ।
तिज पूजाके लाग रानाथारु समुदायके प्रत्येक घरमे सिमै, पुरी, गुलगुला, पकौडा, पपरा लगायतके परिकार पाके लडिया, तल्वान किनारमे कुशके घाँसमे भोज हुइल महिला ७ गाँठी ओ कुवारी लौवरीय ५ गाँठी पारके एक ठो टेपरीमे पुजा कैलक सामान अस्रैना मोर डाडाभैया, भतिज्यके लम्मा आयु हुइस कहटी कामना कैना करटी तिज मनाइल उहाँ बटैलै । लडिया टल्वासे पुजा कैके आइलपाछे पकागिल पकवानसे ब्रत खोल्के खैटी रमैना, महिलाहुँक्रे सामूहिक रुपमे सावनके डोला (बल्हा) झुल्क रमैना चलन रहल नन्दलाल बटैलै ।
ओस्टेक करके बुधके रोज धनगढी उपमहानगरपालिका वडा नं. ७ स्थित मनेहरा गाउँमे रानाथारुके विशेष तिज पर्वके एक कार्यक्रम कैके मनागिल बा । तिज मिलन कार्यक्रम मथुरा रानाके सभापतित्वमे हुइल बा । कार्यक्रमके प्रमुख अतिथी पुर्व वन तथा वातावरण मन्त्री माननीय नारदमुनी राना रहल रहिट । उहाँ देश विदेशमे रहल सक्कु देशवासी, नगरवासी ओ वडावासीहे तिज पर्वके शुभकामना डेले रहिट ।
कार्यक्रमके विशिष्ट अतिथी धनगढी उपमहानगर पालिकाके उपप्रमुख कन्दकला राना १८ दिन सम यी पवै मनैना करल बटैली । यी पर्वमे रानाथारु महिलाहुक्रे निरहार व्रत बैठके साँझ ३,४ बजे भैया, भतिज्वाके नम्मा आयुके कामना करटी लग्गेक लडिया वा पोखरीमे झुटकी पुहैना चलन रहल बटैली ।
कार्यक्रममे धनगढी उपमहानगर पालिका वडा नं. ७ के वडा अध्यक्ष मोती राना, नेपाल रानाथारू समाजके केन्द्रीय उपाध्यक्ष कमलसिंह राना, गाउँके भलमन्सा, अगुवा, समाजसेवी तथा महिला दिदीबहिनीहुकनके उपस्थि रहे । कार्यक्रममे स्वागत मन्तव्य कल्लु राना ओ संचालन निवा राना करल रहिट ।
ओस्टेक धनगढी उपमहानगर पालिका वडा नं. ८ स्थित धनगढी गाउँमे तिज मिलन कार्यक्रमके संयोजक मथुरा रानाके सभापतित्वमे हुइल कार्यक्रममे प्रमुख अतिथी पुर्व वन तथा वातावरण मन्त्री माननीय नारदमुनि राना, विशिष्ट अतिथी धनगढी उपमहानगर पालिकाके उपप्रमुख कन्दकला राना, धनगढी उपमहानगर पालिका वडा नं. ८ के वडा अध्यक्ष जुगराम चौधरी, वडा नं.७ के वडाअध्यक्ष मोती राना, संविधानसभा सदस्य मालामति राना रहिट ।
कार्यक्रममे नेपाल रानाथारु समाजके केन्द्रीय उपाध्यक्ष कमलसिंह राना, पुर्व वडाअध्यक्ष लालमनि राना, गाउँके भलमन्सा, अगुवा, समाजसेवी तथा महिला दिदीबहिनीयाके उपस्थिति रहे । कार्यक्रममे स्वागत मन्तव्य शंकर राना ओ संचालन शिवराज राना करल रहिट ।
तीजके अवसर पारके कैलालीके धनगढी उपमहानगरपालिका ओ कञ्चनपुरके बेलौरी नगरपालिका, पुनर्वास नगरपालिका, लालझाँडी गाउँपालिका बुधके रोज स्थानीय सार्वजनिक बिदा डेहल रहे ।
