थारु समुदायसे गुरही टिहुवार मनैटी

पहुरा समाचारदाता
धनगढी,२५ सावन । कैलाली जिल्लाके टमान ठाउँमे आज गुरही विषेश कार्यक्रमके आयोजना कैके यी टिहुवार मानजैटी रहल बा ।

थारु समुदायसे मनागिल गुरही टिहुवारहे संरक्षण करटी पुस्तान्तरण कैना उद्देश्यसे जिल्लाके मेरमेराइक ठाउँमे गुरही विशेष कार्यक्रमके आयोजना कैगिलक हो । थारु समुदायके पहिचानसे जोरल परम्परागत गुरही टिहुवार विगत कुछ बरस यहोर पहिलेकसे परिमार्जित हुइटी गैल बा । गुरहीसंगसंगै संस्कृतिफे जर्गेना हुइटी गैल बा ।

आज धनगढी उपमहानगरपालिका वडा नम्बर ८ गुरही चोकमे सखि संजाल कैलाली, थारु कल्याणकरिणी सभा धनगढी नगरपालिका समिति, राष्ट्रिय थारु कलाकार मञ्च प्रदेश समिति, थारु महिला सभा कैलाली, थारु महिला सञ्जाल, थारु विद्यार्थी समाज, थारु लेखक संघ, हिरगर साहित्य बगाल, बाचचित घर धनगढी, हमार फाउन्डेसन धनगढी ओ थारु नागरिक समाजलगायत संघसंस्थाके आयोजनामे गुरही अस्रैना ओ विशेष सांस्कृतिक कार्यक्रम कैजैटी रहल बा ।

बाटचित घरके बरघर ठाकुरप्रसाद करिया प्रधान विगतके बरस यी बरस फरक तरिकासे गुरही टिहुवार मनाई लागल बटैलै । उहाँ कहलै, ‘यी बरस सुरुमे सहभागी हुइल लउण्डीहुँक्रे गुरही अस्रैही । गुरही अस्रा सेकलपाछे गुडाभुजा खाके संस्कृतिक कार्यक्रम सुरुवाट कैना कार्यक्रम बा ।

ओस्टेक कैलारी गाउँपालिकाके हसुलियामे नेपाल सांस्कृतिक महासंघ कैलारीके आयोजना तथा कैलारी युथस यूनाइटेड क्लव ओ हसुलिया गाउँ समाजके सह आयोजनामे गुरही विशेष कार्यक्रम धारगिल बा । दुपहर १ बजेसे सांस्कृतिक कार्यक्रम ओ साँझ पाँच गुरही अस्रैना कार्यक्रम धारल कैलारी युथस यूनाइटेड क्लवके अध्यक्ष बनसराम चौधरी बटैलै ।

ओस्टेक कैलारी गाउँपालिका वडा नम्बर ८ पुर्थीपुर स्थित मोहनी बजारमे गुरही विषेश सांस्कृतिक कार्यक्रम धारल बा । उ कार्यक्रम मोहनी बजार व्यवस्थापन समितिके आयोजना हुइटी रहल बा ।

बरघर भलमन्सा समिति लम्की चुहा नगरपालिका कैलालीके आयोजनामे ‘थारु भाषा कला संस्कृति हमार पहिचान, यकर संरक्षण कर्ना हमार साझा अभियान’ कना नाराके साथ लम्कीचुहा नगरापालिका स्तरीय थारु भाषा कला संस्कृतिके जर्गेना कर्ना उद्देश्यसे लम्की चुहा नगरपालिका वडा नं. ४ भल्का बजार गुरही चोकमे आज गुरही असरैना सांस्कृतिक कार्यक्रम हुइना बा ।
कार्यक्रममे थारु भेषभुषा ओ कला संस्कृतिके झलक प्रर्दशन कैजैना, गुरही ओ गुरिया पर्वके महत्व तथा एैतिहासिकताके वारमे वर्णन हुुइना, घुँघरी;े कोहरी मकैके भुजा बरिया, खुर्मा वा टमान मेरिक परिकार (प्रसाद ) ग्राहन कराजैना, गुरिया पर्वहे परम्परागत रुपके लाग स्थापति कर्ना, थारु भाषा कला संस्कृतिके संरक्षण करेक लाग सरकारी तवरसे सम्बोधन करे लगैना, संस्कृतिके माध्यमसे समाजवदके सन्देश फैलैना, संस्कृति संरक्षणके लाग युवा पुस्ता हुक्रन संस्कृति पुस्तान्तरणमे जोड डैजैना कहल बा ।

कैलालीके बर्दगोरिया गाउँपालिका वडा नम्बर ६ पुथ्वीपुर, गुरही चोकमे श्री जनजागरण यूवा क्लवके आयोजना तथा कैलाली इभेन्ट एण्ड मिडिया नेटवर्क प्रालिके सहआयोजनामे गुरही अस्रैना तथा सांस्कृतिक कार्यक्रम धारल बा । यी कार्यक्रमहे भव्य बनाइक लाग स्थानीय चर्चित कलाकार, गायक, डान्सर, कमेडियनहुकनके सहभागिता रना बा ।
कैलाली जिल्लामे स्थापित हुसेकल गुरही कार्यक्रम काठमाण्डौ प्रज्ञा प्रतिस्थान ओ बाँके, बर्दिया, सुर्खेत ओ दाङ जिल्लामेफे भव्यताके साथ आज मनाजैटी रहल बा ।

कैलालीमे गुरही टिहुवारके लाग सार्वजनिक विदा

थारु समुदायसे मनाजैना गुरही टिहुवारके अवसरमे कैलालीके टमान स्थानीय तहमे सावन २५ गते स्थानीय विदा डेना निर्णय करले बा ।
थारु समुदायके बसोबास रहल कैलालीके अधिकाँस स्थानीय तहसे सार्वजनिक सूचना जारी कैके सावन २५ गते एक दिन सार्वजनिक विदा डेना निर्णय कैटी पालिकाभिटर रहल सरकारी, गैरसरकारी कार्यालय, शिक्षण संस्था, बैंक तथा वित्तीय संस्थाम विदा रना जनैले बा ।
कैलारी गाउँपालिका उपाध्यक्ष भगवतीकुमारी चौधरी गुरही टिहुवारके लाग सावन २५ गते स्थानीय विदा डेना निर्णय हुइल ओरसे सावन २५ गतेक दिन गाउँपालिकाभिटर सक्कु सरकारी तथा गैरसरकारी कार्यालय, शिक्षण संस्था, बैंक तथा वित्तीय संस्थामे विदा रना जनैली । नेपालीहुक्रे नागपञ्चमीके रुपमे मनाइबेर थारु समुदाय यि दिनहे गुरही टिहुवारके रुपमे मनैना करल बा ।
कैलाली जिल्लाके धनगढी उपमहानगरपालिका, कैलारी गाउँपालिका, बर्दगोरिया गाउँपालिका, भजनी नगरपालिका, जोशीपुर गाउँपालिका, जानकी गाउँपालिका, टीकापुर नगरपालिका, घोडाघोडी नगरपालिका, गौरीगंगा नगरपालिका, गोदावरी नगरपालिकासे सावन २५ गते सार्वजनिक विदा डेना निर्णय करले बा ।

गुरही टिहुवारके अवसरमे रक्तदान कैगिल

गुरही टिहुवारके अवसरमे विफेक रोज धनगढी उपमहानपालिका वडा नम्बर ८ गुरही चोकमे रक्तदान कार्यक्रम निम्जल बा ।
गुरही अस्रैना कार्यक्रम २०८१ मुल आयोजक समिति धनगढी कैलालीके आयोजनामे रक्तदान कार्यक्रम कैगिल हो । उ कार्यक्रमके लाग बाटचित घर संयोजन करले बा । कलेसे प्रायोजकमे रोदन चौधरी फार्मेसी, ओ प्राविधिक सहयोग नेपाल रेडक्रस सोसाइटी जिल्ला शाखा कैलाली रहल बा ।
थारु समुदायमे डेखा परल सिकलसेल एनिमिया रोग लागल मनैनहे ढेर रगतके आवश्यकता परल ओरसे रगतके अभावहे कम करेक लाग रक्तदान कार्यक्रम कैगिल उ अभियानके संयोजक ठाकुरप्रसाद करियाप्रधान जानकारी डेलै । रक्तदान कार्यक्रममे ४१ जाने रगत डेहल उहाँ जनैलै ।
रक्तदान करुइयनहे थारु कल्याणकारिणी सभाके केन्द्रीय सदस्य प्रभातकुमार चौधरी, थाकस कञ्चनपुरके सभापति सानु चौधरी, थाकस धनगढी उपमहानगरपालिका नगरसभापति सूर्य प्रसाद चौधरी, थाकस कैलालीके निवर्तमान कार्यवाहक सभापति माधव चौधरीलगायतसे प्रमाणपत्र डेहल रहिट ।