युनिक नेपालसे वार्षिक प्रगति समीक्षा

निर्मल रैका
धनगढी,२५ सावन । देशके प्रतिष्ठत लघुवित्त तथा अन्तर्राष्ट्रियस्तरके स्मार्ट क्याम्पियन सर्टिफिकेट (प्रमाणपत्र) प्राप्त युनिक नेपाल लघुवित्त वित्तीय संस्था लिमिटेडसे अपन वार्षिक प्रगति समिक्षा तथा कर्मचारी क्षमता विकास तालिम सम्पन्न करले बा ।

धनगढीमे हुइल उ वार्षिक प्रगति समिक्षा तथा कर्मचारी क्षमता विकास तालिम कार्यक्रमके अध्यक्षता युनिक नेपाल लघुवित्त वित्तीय संस्था लिमिटेडके कार्यकारी निर्देशक लघुवित्त विज्ञ तथा सामाजिक अभियन्ता डा.गोपाल दहित रहल रहिट । कार्यक्रमके प्रमुख अतिथी युनिक नेपाल लघुवित्त वित्तीय संस्था लिमिटेडके संचालक समिति अध्यक्ष शिव बहादुर चौधरी, विशिष्ट अतिथिमे युनिक नेपालके अध्यक्ष प्रिम बहादुर थारु, संचालक समिति सदस्य समाजसेवी पुरन प्रसाद चौधरी, जागेश्वर प्रसाद चौधरी रहल रहिट ।

अतिथिमे युनिक नेपाल लघुवित्त वित्तीय संस्था लिमिटेडके एच आर तथा तालिम सेक्सन प्रमुख मा बहादुर थारु, लघु वित्त सेक्सन प्रमुख मदन चौधरी, आइटी प्रमुख रमेश चौधरी, वरिष्ठ अधिकृत तुलाराम चौधरी, आन्तरिक लेखा परिक्षक तथा वरिष्ठ अधिकृत विनोद कुवंर, ईलाका कार्यालय धनगढीके प्रमुख सन्तकुमार चौधरी लगायत रहल रहिट ।

उ समिक्षा कार्यक्रममे युनिक नेपाल लघुवित्त वित्तीय संस्था लिमिटेडके सुदुरपश्चिम प्रदेशमे रहल जिल्ला कैलाली ओ कञ्चनपुर करके २० शाखाके ७७ जाने आ.व.०८०।८१ को आ अपन प्रगती विवरण प्रस्तुत करल रहिट ।

२ दिन सम सञ्चालन हुइल समिक्षा तथा क्षमता विकास तालिम कार्यक्रममे संस्थाहे आघे बह्रैना ओ हालके प्रगतीके अवस्था साथे थप सुझाव डेना कार्यक्रमके आयोजाना करल युनिक नेपाल लघुवित्त वित्तीय संस्था लिमिटेडके एच आर तथा तालिम सेक्सन प्रमुख मान बहादुर थारु बटैलै ।

कार्यक्रममे बोल्टी युनिक नेपाल लघुवित्त वित्तीय संस्था लिमिटेडके कार्यकारी निर्देशक लघुवित्त बिज्ञ तथा सामाजिक अभियन्ता डा.गोपाल दहित आ.व.०८१।०८२ के भावी मार्ग चित्र,नीति तथा कार्यक्रमके उदेश्य ,उद्यमसिलता विकास कैना, संस्थासे अब्लम्बन करल उदेश्यसंगे संस्थासे पुगे चाहल लक्ष्यमे सदा सजग हुके कर्मचारीसे अपन क्षमता विकास करटी आघे बह्रे पर्ना साथे परिवर्तित नीति नियम तथा निर्देशिकाबारे सक्कु जाने जानकार हुई पर्नामे जोड डेलै ।

ओस्टेक करके प्रमुख अतिथी तथा युनिक नेपाल लघुवित्त वित्तीय संस्था लिमिटेडके संचालक समिति अध्यक्ष शिवबहादुर चौधरी हम्रे निरन्तर ईमान्दारी पुर्वक दत्तचित्त, अनुशासित हुके कार्यसम्पदान करेलेसे सफल हुइना ओ संस्थाफे मजा हुइटी जैना बटैलै ।
युनिक नेपालके अध्यक्ष तथा विशिष्ट अतिथि प्रिम बहादुर थारु एक ठो गैरसहरकारी संस्थाके रुपमे ग्रामीण क्षेत्रमे काम करटी ओकरे सफलतासे आज वित्तीय क्षेत्रमेफे कुछ करे परठ कहटी युनिक नेपाल लघुवित्त वित्तीय संस्था लि. नामक संस्थासे सेवा करटी आइल ओ सुरुके दिनमे संस्थाके अवस्था ओ निरन्तर मिहिनेतसे आज यी अस्थामे आपुगलमे खुसी व्यक्त करलै । कार्यक्रमा विशिष्ट अतिथि समेत रहल थारु संस्थाहे यी अवस्थामे यहाँसम पुगाके निरन्तर, मिहिनेत तथा कुशल व्यवस्थापन करलमे संस्थाके कार्यकारी निर्देशकहे धन्यवाद तथा बधाइ समेत डेलै ।

ओस्टेक करके युनिक नेपाल लघुवित्त वित्तीय संस्था लिमिटेडके संचालक समिति सदस्य तथा .कार्यक्रमके विशिष्ट अतिथि पुरन प्रसाद चौधरी सस्थाके टमान सकारात्मक पक्ष रहल थप सुधार तथा यी क्षेत्रके बल्गर संस्थाके रुपमे रहेक लाग कमी कमजोरी हटैटी आघे बह्रे पर्ना बटैलै । यी क्षेत्रमे युनिक नेपाल लघुवित वित्तीय संस्था लिमिटेडके अलगे छाप रहलमे उहीहे निरन्तरता डेके आघे बह्रे पर्नामे जोर डेलै ।

समितिके सदस्य जागेश्वर प्रसाद चौधरी संस्थासे अबलम्बन करल नीति नियम तथा सरोकारवाला निकायके जारी नीति नियमहे ध्यानमे धारके चनाखो हुके कार्य सम्पादन करे पर्नामे जोर डेलै ।

धितो कर्जा सम्बन्धमा लघु वित्त सेक्सन विभाग प्रमुख मदन चौधरी, सम्पत्ति शुद्धीकरण निवारण सम्बन्धमे बरिष्ठ अधिकृत तुलाराम चौधरी, संस्थाके आ.व.०८०।८१ के अवस्था, आइटी सुरक्षा सम्बन्धी आईटी विभाग प्रमुख रमेश चौधरी, आन्तरिक लेखा परिक्षणके क्रममे डेखल कमी कमजोरी सम्बन्धमे वरिष्ठ अधिकृत विनोद कुवंर प्रकाश पारल रहिट ।

यी अवधिमे कम्पनीके वितरण योग्य मुनाफा १८ करोड ६५ लाख ५१ हजार २४ रुपैयाँ रहल बा कलेसे वितरण योग्य प्रतिशेयर आम्दानी १२५ रुपैयाँ ६ पैसा रहल बा । कम्पनीके वितरण योग्य मुनाफा कम्पनीके चुक्ता पुँजीसे ढेर हो । यी अवधिमे कम्पनीके प्रतिशेयर आम्दानी २६।२७ रुपैयाँसे बह्रके ३२।२८ रुपैयाँ पुगल बा कलेसे कम्पनीके प्रति शेयर नेटवर्थ ३३४।३८ रुपैयाँ रहल बा ।
कम्पनीके चुक्ता पुँजी १४ करोड ८५ लाख रहल बा कलेसे रिजर्भमे १९ करोड ५५ लाख रहल बा । कम्पनीो खराब कर्जा १४।७१ प्रतिशतसे घटके १२।७४ कायम हुइल बा ।

युनिक नेपाल लघुवित्त वित्तीय संस्था लिमिटेड २०५७ सालसे पाछे पारल वर्ग थारु, दलित,मुस्लिम, आदिबासी,जनजाती, सिमान्तकृत समुदाय गरिबीके रेखाटरे रहल महिला डिडीबहिनीयाहुकनहे लघुवित्त कार्यक्रमसे आर्थिक रुपमे सवल बनैटी आइल बा । हाल युनिक नेपाल लघुवित्त वित्तीय संस्था लिमिटेडसंग करिब ८३ हजारसे ढेर महिला लघुवित्त सेवा लेटी समुहमे जोरल बटै । युनिक नेपाल लघुवित्त वित्तीय संस्था लिमिटेड कैलाली, कञ्चनपुर, बांके,बर्दिया,दाङ, कपिलवस्तु, करके ६ ठो जिल्लामे ४१ ठो शाखा मार्फत सेवा बिस्तार करटी आइल बा ।

कार्यक्रमके सञ्चालन युनिक नेपाल लघुवित्त वित्तीय संस्था लिमिटेडके एच आर तथा तालिम सेक्सन प्रमुख मानबहादुर थारु करले रहिट ।