कैलारीके जनप्रतिनिधिनसे वनदेवी मन्दिर परिसर सरसफाई

पहुरा समाचारदाता
हसुलिया, २६ सावन । कैलारी गाउँपालिकाके जनप्रतिनिधिहुक्रे धार्मिक पर्यटकीय स्थल वनदेवी मन्दिर परिसर सरसफाई करले बटै ।
शनिच्चरके रोज गाउँपालिका उपाध्यक्ष भगवतीकुमारी चौधरीके अगुवाईमे जनप्रतिनिधिहुक्रे वनदेवी मन्दिर परिसर सरसफाई करल रहिट । मन्दिरमे दर्शन ओ पिकनिक खाइ आइल मनै आपन नानल चिज जथाभावी फेकल कारण फोहर हुइल ओरसे सरसफाई करगिल हो ।

मन्दिर अवलोकन तथा पुजापाठ करे आइल मनै परिसरमे टमान प्लाष्टिक फेक्डेना ओ पिकनिक खाइल मनै पानी बोटल, वियरके बोटल जथाभावी फेकल कारण मन्दिर परिसर फोहर हुइल हुइटी बा । जनप्रतिनिधिहुक्रे मन्दिरके आघे जामल झारपाट सफा कैनाके साथे जथाभावी फेकल पानीके बोटल, वियरके बोटल, प्लाष्टिक विटोर व्यवस्थापन करले बटै ।
गाउँपालिका उपाध्यक्ष भगवतीकुमारी चौधरी कहली, ‘मन्दिर जैसिन ठाउँमे फोहर हुइलेसे नैसुहाइठ । यकर सरसफाई कैना सक्कु जानेक कर्तव्य हो । अवलोकन करे जउइया ओ पिकनिक खाइ जउइया उत्पादन हुइल फोहर नैकैही कलेसे उ ठाउँमे फोहर कम रही ।’

वडा नम्बर ३ के वडा अध्यक्ष सन्तराम चौधरी भगवानके आस्था रख्ना ठाउँ जबफे सफा हुई पर्ना बटैठै । कौनो ठाउँ फोहोर रहठ कलेसे नकारात्मक सोच पैदा हुइठ,’ उहाँ कहलै, ‘उ ठाउँमे दैनिक सयौं व्यक्तिके आवागमन हुइना धार्मिक पर्यटकीय जैसिन क्षेत्रहे सदा सरसफाई राखे पर्ना जरुरी रहठ ।’



सरसफाई कार्यक्रममे वडा अध्यक्षहुक्रे, कार्यपालिका सदस्य, वडा सदस्यहुकनके सहभागिता रहे ।
