सीमान्तकृत समुदायके जिविकोपार्जनमे प्रभाव पर्ना सवालमे सामुदायिक संवाद कार्यक्रम

पहुरा समाचारदाता
सुखड, २२ अगहन । सीमान्तकृत समुदायके जिविकोपार्जनमे प्रभाव पर्ना नीतिगत, समाजिक तथा वातावरणीय सवालमे सामुदायिक संवाद कार्यक्रम कैलालीके घोडाघोडी नगरपालिकामे सम्पन्न हुइल बा ।

युएनडीपि के सहयोगमे परिवर्तनका लागि कार्यरत युवा समुह (याक नेपाल) के आयोजनामे कार्यक्रम सम्पन्न हुइल हो । वातावरण मैत्री अभ्यास ओ जैविक प्रविधिके प्रवर्धन, संरक्षण ओ समुदायके अधिकार तथा भूमिकाके बिषयमे जनचेतना बढैना, लक्षित वर्गके उपलब्ध श्रोत साधन उप्परके पहँुचके लाग वकालत तथा पैरवी कैना क्षमता अभिवृद्धि कैना, समावेशी विकासके प्रवद्र्धनक लाग सरकारी तथा गैर सरकारी संघ संस्थासंगके सहकार्य ओ साझेदारी विकास कैना लगायतके उदेश्यके साथ कार्यक्रम सम्पन्न हुइल हो ।

कार्यक्रममे समुदायके परम्परागत जिविकोपार्जनके श्रोतके पहिचान करके उ कार्य उप्पर बाधा पर्ना सामाजिक वातावरणीय ओ नीतिगत रुपमे असर पर्ना तत्व पहिचान करके सम्बन्धीत सरोकारवालाके ध्यानाकर्षण करेक लाग छलफल करल रहे ।
छलफलसे सरकारके नीति तथा कार्यक्रम लक्षित वर्ग मुखी नइहुइना, सूचनामे लक्षित वर्गके सहज पहुच नैहुइना, रैथाने तथा स्थानीय वाली संरक्षणहे प्राथामितामे नैरख्ना, लक्षित वर्गके लाग तोकल कार्यक्रम प्राप्त कैना झन्झटिलो प्रक्रिया हुइना लगातके सवाल पहिचान हुइल रहे । कार्यक्रमके सहजीकरण परियोजना अधिकृत सर्जु चौधरी ओ विनोद बहादुर सिंह करल रहिट ।

कार्यक्रममे सम्बन्धित वडाके महिला सदस्य, कृषक महासंघके केन्द्रीय सदस्य ओम आचार्य, टमान सामुदायिक वनके प्रतिनिधि, घोडाघोडी क्षेत्र संरक्षण तथा जनजागरण मञ्चके अध्यक्ष हेम बम, चरा संरक्षण नेटवर्क कैलालीके उपाध्यक्ष नवराज न्यूरे, खाद्य अधिकार संञ्जाल घोडाघोडीके प्रतिनिधि, विद्यार्थी, शिक्षक, लगायतके अतिथि रहिट ।
दिगो जिविकोपार्जनका लागि समावेशी विकास परियोजना अन्तर्गत घोडाघोडी नगरपालिकाके सिमान्तकृत समुदायके लाग उ कार्यक्रम समपन्न हुइल हो । कार्यक्रममे घोडाघोडी नगरपालिकाके ४, ५, ८, १० वडाके सिमान्तकृत समुदायके सहभागिता रहे ।

युएनडीपि के सहयोगमे याक नेपाल मार्फत यी परियोजना २०८१ जेठ २१ से यिहे अगहन अन्तिमसमके लाग घोडाघोडीमे लागु हुइल हो । परियोजना अवधिभर लक्षित बर्गके क्षमता अभिवृद्धिके लाग अभिमुखीकरण, तालिम, गोष्ठी, संम्बाद, श्रव्य दृष्य सामग्रीके सहयोग तथा प्रयोग ओ श्रोतकेन्द्र स्थापना कैना परियोजनाके फोकल पर्सन तथा याक नेपालके कार्यकारी निर्देशक डबल बम जानकारी डेलै ।