धनगढी उपमहानगरपालिकासे खुटिया–दिपायल द्रुतमार्ग निर्माणके लाग हस्ताक्षर संकलन कैना रजिस्टर सहयोग
पहुरा समाचारदाता
धनगढी, २३ असार । खुटिया–दिपायल द्रुतमार्ग निर्माणके लाग हस्ताक्षर संकलन कैना धनगढी उपमहानगरपालिकासे शैलेश्वरी मन्दिर गुठीहे ११ ठो रजिस्टर हस्तान्तरण करले बा ।
सोम्मार नगर प्रमुख गोपाल हमालके उपस्थितिमे प्रमुख प्रशासकीय अधिकृत जनकराज भट्ट ओ वडा नम्बर ३ के अध्यक्ष राजबहादुर ऐरसे गुठीके अध्यक्ष एवं मन्दिरके पुजारी प्रेमसागर भट्टहे रजिस्टर हस्तान्तरण करल हुइट ।
जेठ शुक्लपूर्णिमाके दिनसे शैलेश्वरी मन्दिरमे द्रुतमार्ग निर्माण कैना सरकारहे दबाब डेना कहटी हस्ताक्षर अभियान सुरू करल हो । उ अभियानहे सहयोग पुगे कहिके धनगढी उपमहानगरपालिकासे रजिस्टर सहयोग करल जनैले बा ।
द्रुतमार्ग निर्माण हुइलेसे डोटी जिल्लामे आर्थिक गतिविधि बह्रना हुइल ओरसे दुई लाख २० हजार व्यक्तिके हस्ताक्षर संकलन करे पुग्ना ११ ठो रजिस्टर सहयोग करल हो ।
आगामी माघमे हुइना कोटीहोम महायज्ञमे हस्ताक्षर संकलन कैना सहयोग पुगे कहिके उपमहानगरसे रजिस्टर सहयोग करल जानकारी डेहल बा ।
धनगढी उपमहानगरपालिकासे द्रुतमार्ग निर्माणके लाग दबाब डेना हस्ताक्षर अभियान चलैना रजिस्टर सहयोग करल कहटी शैलेश्वरी गुठीके अध्यक्ष एवं मन्दिरके पुजारी भट्टसे खुशी व्यक्त करटी धन्यवाद डेले बटै ।
