एचआइभी एड्स प्रभावितहे सामाजिक लाञ्छना ओ भेदभाव
पहुरा समाचारदाता
धनगढी, २२ असार । एचआइभी एड्स प्रभावितहुक्रे सामाजिक अपहेल्नाके कारण खुल्ला रुपमे आई नैसेकल बटागिल बा ।
राष्ट्रिय एड्स तथा यौन रोग नियन्त्रण केन्द्रसे धनगढीमे आयोजित एचआइभी, हेपाटाइटिस ओ यौनरोग सम्बन्धी लाञ्छना तथा भेदभाव न्यूनीकरण सम्बन्धी कार्यक्रममे यैसिन बटाइल हो ।
एचआइभी हुइल व्यक्तिहे मानसिक समस्या ढेर हुइना कारणसे स्वास्थ्यमे ढेर जटिल असर परटी रहल केन्द्रके निर्देशक डा. सर्वेश शर्मा बटैलै ।
“एचआइभी लागलपाछे ढेर बिरामी डिप्रेसन वा एन्जाइटीके समस्या झेले परल डेखजाइठ”, उहाँ कहलै,“ ओ, यैसिन समस्या बह्रटी बा ।”
सामाजिक लाञ्छनाके डरके कारण एचआइभी सङ्क्रमितसे समस्या लुकाके बैठेबेर थप समस्या भोग्टी रहल बटाइल बा । डा. शर्माके अनुसार पहिल बाट टे बिरामी पत्ता लगैना चुनौती रहल बा । बसाइँसराइँके कारणसे एचआइभी जाँचमे समस्या हुइटी रहल बटाइल बा । ओस्टेक करके, कतिपय मनै स्वास्थ्य जाँच कराई नैमन्ना करल बटाइल बा । “एचआइभी टेस्ट अपनहीफे कराई सेक्जाई”, उहाँ कहलै,“मने, मनै टेस्ट करैना परिपाटी डेखल नैहो ।”
ओस्टेक करके, हेपाटाइटिस बी ओ सीके बिरामी उपचारके पहुँचमे नैरहल जनाइल बा । केन्द्रके अनुसार नेपालमे कुल ३४ हजार ३३७ जाने एचआइभी सङ्क्रमित मनै बटै । ओस्टेक करके, वार्षिक ६१४ जाने बिरामी ठप्ना काम हुइटी रहल बा । एचआभी एडसके कारण वार्षिक ५६८ जाने ज्यान गुमैना करल जनाइल बा ।
कार्यक्रममे नेपाल पत्रकार महासंघ सुदूरपश्चिम प्रदेशमे अध्यक्ष भरत शाह एचआइभीसहित यौन रोग बोकल व्यक्तिउप्पर हुइना विभेद न्यूनीकरणके लाग सञ्चार माध्यमसे महत्वपूर्ण भूमिका निर्वाह करटी आइल बटाइल बा ।
