६४ प्रतिशत किसान सूचीकरण

आगामी वर्षसे वर्गीकरण ओ परिचयपत्र

काठमाडौं, २२ असार । सरकारसे राष्ट्रिय अभियानके रूपमे सञ्चालन करटी रहल ‘किसान सूचीकरण कार्यक्रम’से लक्ष्यसे ढेर सफलता हासिल करल कृषि सूचना तथा प्रशिक्षण केन्द्र दाबी करले बा ।

आर्थिक वर्ष २०८२\८३ के असार मसान्तसम २४ लाख ५० हजार किसान सूचीकृत कैना लक्ष्य राखलमे उ लक्ष्य पार करटी हालसम देशभर २६ लाख ४५ हजार किसान परिवार यी प्रणालीमे आवद्ध हुसेकल केन्द्र जनाइल हो ।

यी संख्या देशके कुल किसान परिवारके करिब ६४ प्रतिशत हो । सरकारके १०० बुँदे कार्यसूचीमे उच्च प्राथमिकताके साथ समेटल यी कार्यक्रमसे पछिल्का समय तीव्र गति लेहल केन्द्रके कहाई बा । किसानहुकनके अथक परिश्रम ओ योगदानके सम्मान, पहिचान तथा संरक्षण कैना ‘खाद्य अधिकार तथा खाद्य सम्प्रभुतासम्बन्धी ऐन, २०७५’ अनुरूप यी अभियान सञ्चालनमे ल्यानल हो ।
कृषि, वन तथा पर्यावरण मन्त्रालयके विशेष सक्रियता, कृषि सूचना तथा प्रशिक्षण केन्द्रके समन्वय ओ स्थानीय तहके निरन्तर प्रयासके कारण सूचीकरणमे यी सफलता प्राप्त हुइल दाबी करल बा ।

सरकारसे अइना वर्षसे किसानके वर्गीकरणसहित ‘किसान परिचयपत्र’ वितरण कैना तयारी सुरु करल केन्द्रके प्रमुख शवनम शिवाकोटी जानकारी डेली । कृषि मन्त्रालयसे यकर लाग आवश्यक तयारी आघे बह्रैना केन्द्रहे निर्देशन डेसेकल उहाँ बटैली ।
मन्त्रालयके निर्देशनपाछे केन्द्रसे विद्यमान प्रणालीहे अद्यावधिक कैना तथा प्रदेश ओ स्थानीय तहसंगके समन्वय एवम् सहजीकरणके कामहे तीव्रता डेहल बा । साथे, केन्द्रसे सूचीकरण ओ प्रमाणीकरणके कामहे उच्च प्राथमिकतामे धारके शीघ्र सम्पन्न कैना सक्कु स्थानीय तहहे अनुरोधसमेत करल बा ।

किसान परिचयपत्र वितरणसे कृषकहुकनहे राज्यसे उचित पहिचान ओ सम्मान प्रदान कैना भारी सहयोग पुग्न विश्वास लेहल बा । यिहीसे सरकारसे प्रदान कैना कृषि सेवा तथा सुविधाहे एकीकृत कैना, वास्तविक तथ्यांक संकलन कैना ओ किसानहे डेना अनुदानके प्रभावकारी अनुगमन कैना सहज हुई ।

ओस्टेक करके, विद्यमान अन्य सरकारी प्रणालीसंग अन्तरआबद्धता कायम करके सेवा प्रवाहहे थप सरल, पारदर्शी ओ प्रभावकारी बनाई सेक्ना सरकारके कहाई बा ।