थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २९ माघ २६४८, मंगर ]
[ वि.सं २९ माघ २०८१, मंगलवार ]
[ 11 Feb 2025, Tuesday ]
‘ नेपाली काँग्रेस कैलारी गाउँपालिकाके दुसरा सम्मेलन सम्पन्न ’

कैलारीके विकासमे प्रदेश सरकारके सहयोग ओ समर्थन रहीः पुर्व मन्त्री देउवा

पहुरा | २३ माघ २०८१, बुधबार
कैलारीके विकासमे प्रदेश सरकारके सहयोग ओ समर्थन रहीः पुर्व मन्त्री देउवा

पहुरा समाचारदाता
हसुलिया, २३ माघ ।
नेपाली काँग्रेस कैलारी गाउँपालिका कार्यसमितिके दुसरा सम्मेलन बुधके रोज हसुलियामे सम्पन्न हुइल बा ।

सुदूरपश्चिम प्रदेश सरकारके पूर्व भौतिक पूर्वाधार विकास मन्त्री माननीय प्र्रकाशबहादुर देउवा प्रमुख अतिथि रहल रहिट । कार्यक्रममे सम्बोधन करटी कैलारी गाउँपालिकाके विकासके लाग प्रदेश सरकारके सहयोग ओ समर्थन रना बटैले बटै ।

कैलारी गाउँपालिकामे सुर्मीनाला बढैपुर सडक खण्ड निर्माणमे ढिलाई हुइल कहटी संघीय सरकारसे छलफल कैना उहाँ बटैलै । उहाँ कहलै, ‘यहाँ मुक्तकमैया बस्तीमे लालपुर्जा नैपाइल समस्या बा, अब्बे भुमि आयोग फेरसे गठन हुइल बा । आब हाली काम आघे बह्री । लम्मा समयमे भोगचलन मने लालपूर्जा नैपाइल मुक्तकमैयाके माग सम्बोधन कैना ओर आघे बह्रजाई ।’

कैलारी गाउँपालिकामे नदिनालाके कारण कटान डुबान, पटानके समस्या रहल ओरसे प्रदेश सरकार उ समस्या समधानके लाग आघे वह्रना पूर्व मन्त्री बटैलै । नेपाली काँग्रेस पार्टी जनताके हकअधिकार डेहुवाइक लाग सदैव आघे बह्रल कहटी २०८४ सालके चुनाव नेपाली काँग्रेस एक्केली लरना हुइल ओरसे अब्बेफेहेस तयारीमे जुटना उहाँ आग्रह करलै ।

कार्यक्रमके विशिष्ट पहुना नेपाली काँग्रेस प्रदेशसभाके सदस्य, महासमिति सदस्य तथा कैलारी गाउँपालिका अध्यक्ष राजसमझ चौधरी जौन ठाउँमे काँग्रेसके विजयी हुइठ, उ ठाउँमे जनतासे तिर्न कर घटैना करल बटैलै । उहाँ कहलै, ‘कैलारी गाउँपालिकामे लडिया कटान, पटान, डुबान बा, यहाँके किसान छाडा चौपायासेसमे पीडित बटै । हम्रे चुनाव लरेबेर घोषणा करले रही । जिटके आइलपाछे पहिल निर्णयसे किसानसे तिर्न मालपोत आधा घटैली ।’

उहाँ कहलै, ‘किसान सक्कु ओरसे पीडिट बटै । लडिया कटान, डुबान ओ छाडा चौपायाके कारण मारमे परटी गैल ओरसे हम्रे आृेइनके पीडाहे सम्बोधन करेक खोजल हुई । मजा कामके सक्कु जाने प्रशंसा कैना जरुरी बा ।’
कैलारी गाउँपालिका ओ क्षेत्र नम्बर ३ मे अभिभावक विहिन हुइल महशुस हुइलफे उहाँ बटैलै ।

महासमिति सदस्य तथा कैलारी गाउँपालिका उपाध्यक्ष भगवतीकुमारी चौधरी चुनावी घोषणापत्र ढेर पुरा हुसेकल बटैली । उहाँ कहली, ‘नेपाली काँग्र्ेस लोकतान्त्रिक पार्टी रहल ओरसे यी विकास कैली, उ विकास कैना कहिके गलत प्रचार कबु नैकरल हो । बल्की करल कामके प्रचार प्रसार नैहुइल हो । ताल तलैयालगायत सार्वजनिक सम्पतिके कर अइना बाँकी रहल ओरसे एकद्वार प्रणालीसे एक्के टोकरीमे पैसा जम्मा हुई पर्ना जरुरी रहल बा ।’

कैलारी गाउँपालिकास शिक्षा, स्वास्थ्य ओ कृषि क्षेत्रहे ढेर प्राथमिक डेहल उहाँ बटैली ।

महासमिति सदस्य तथा नेपाल थारु संघके केन्द्रीय सदस्य रामचरण चौधरी कैलारी गाउँपालिकामे ढेर काम हुइल मने प्रचार प्रसार नैहुइल बटैलै । उहाँ संघीय सरकारसे पाइ पर्ना सहयोग नैपाके विकाससे बञ्चित रहल बटैलै । सुदूरपश्चिम प्रदेश सरकारहे कैलारीमे विकास करडेहक लाग मजा भुमिका निर्वाह कैना उहाँ आग्रह करलै ।

महासमिति सदस्य पुरन प्रसाद चौधरी कैलारी गाउँपालिकामे प्रदेश सरकारसे भौतिक पूर्वाधारके सहयोग करेपर्ना जरुरी रहल बटैलै । कैलारीमे १५ शैयाके अस्पताल बनसेकल कहटी उहीहे संचालन करे सेक्लेसे यहाँके आर्थिक अवस्था कम्जोर रहल परिवार अपन गाउँठाउँमे उपचार कराई सेक्ना, कैलारीमे बहुमुखी क्याम्पस सञ्चालन करे सेक्लेसे यहाँके विद्यार्थी अपन गाउँठाउँमे बैठके उच्च शिक्षा पाई सेक्ना उहाँ बटैलै ।

महाधिवेशन प्रतिनिधि मनिराम बखरिया २०८४ सालमे नेपाली काँग्रेस अक्केली चुनाव लरना ओरसे अब्बेसे पार्टीके सक्कु संगठनहे सक्रिया बनाई पर्ना जरुरी रहल बटैलै ।

कार्यक्रममे नेपाली काँग्रेसके जिल्ला सदस्य तथा प्रचार प्रसार विभाग प्रमुख तपेन्द्र भुषाल कैलारी गाउँपालिकाके होल बडिमे नेपाली काँग्रेसके जिट हासिल करके इतिहास कायम करल बटैलै । उहाँ कहलै,जनता सामु करल बाचा पुरा करलेसे ८४ के चुनावमे फेरसे जिट सुनिश्चित रहल बटैलै ।

नेपाल तरुण दलके केन्द्रीय सदस्य लोकराज पाण्डे ‘आगो’ कैलारी गाउँपालिकाबासीहुक्रे नेपाली काँग्रेसहे समर्थन करल कहटी करल बाचा पुरा कैना आग्रह करलै ।

कैलारी गाउँपालिका वडा नम्बर ५ क वडा अध्यक्ष विष्णु प्रसाद चौधरी जनता ओ कार्यकर्ता विचके दुरी कायम करेक लाग सम्बन्ध सुमधुर बनाई ओ जनताके गुनासो सुने पर्ना जरुरी रहल बटैैलै । उहाँ कहलै, ‘पहिले तालतलैया, सामुदायिक वनके पैसा आजाए, अब्बे रुकल ओरसे आयस्रोत घटल बटैलै । उहाँ विकास ओ सुशासन संगसंगे लैजाई पर्ना बटैलै ।

कार्यक्रममे वडा नम्बर २ के वडा सभापति आरती चौधरी, तरुण दल कैलारीके अध्यक्ष केदार चौधरी, नेपाल विद्यार्थी संघके जिल्ला अध्यक्ष मनिष कुवँर, वडा नम्बर २ के कृष्ण चौधरीलगायत मन्तव्य राखल रहिट । कार्यक्रममे नेपाली काँग्रेस कैलारी गाउँपालिकाके राजनीतिक संगठनात्मक तथा आर्थिक प्रगती प्रतिवेदन सचिव ज्ञानु चौधरी करल रहिट ।

नेपाली काँग्रेस कैलारी गाउँपालिका कार्यसमितिके सभापति कृष्ण प्रसाद चौधरीके अध्यक्षतामे हुइल कार्यक्रममे उपसभापति सोनुराम चौधरी स्वागत मन्तव्य तथा संचालन सचिव मीना चौधरी करल रहिट । यिहे विच जनक चौधरीहे नेपाल विद्यार्थी संघ कैलारीके संयोजकके जिम्मेवारी डेहल बा ।

कार्यक्रममे नेपाली काँग्रेसके आमान्त्रित केन्द्रीय सदस्य आशाराम चौधरी, महासमिति सदस्यहुक्रे महाधिवेशन प्रतिनिधिहुक्रे, जिल्ला सदस्यहुक्रे, पार्टी टमान संगठन किसान संघ, नेपाल थारु संघ, शिक्षक संघ, महिला संघ, दलित संघ, नेपाल विद्यार्थी संघ, नेपाल तरुण दललगायत नेपाली काँग्रेसके नेता तथा कार्यक्रमहुकनहे सहभागिता रहे ।

जनाअवजको टिप्पणीहरू