उच्छृंखल समूहसे ५८ ट्रि गार्डमे क्षति

पहुरा समाचारदाता
धनगढी, ३ चैत । कैलालीके धनगढी उपमहानगरपालिकामे बिरुवा संरक्षणके लाग धारल ५८ ट्रि गार्ड उखारके फेकल बा ।

धनगढी–दिपायल द्रुतमार्गअन्तर्गत धनगढीके ढुंगे बजारसे वडा नम्बर ११ के कार्यालयसमके खण्डमे राखल ट्रि गार्ड उखारके फेकल हो ।

उपमहानगरपालिकाके इन्जिनियर दिजराज भट्टके अनुसार हुर्कटी रहल रुखुवक टेलुवा टुरना करके ट्रि गार्ड फेकल बा । ‘ट्रि गार्ड फेकल सूचना पाइलपाछे हमार टिम उ क्षेत्रमे पुगल रहे,’ उहाँ कहलै, ‘कुछ ट्रि गार्डहे उखारके कुछ दुरसम फेकल बा । कलेसे कुछ ओटरे ढलाइल केल बा । मदिरा सेवन करल उच्छृंखल समूहसे ओसिन करल हुइसेक्ठ ।’

यहोर धनगढीके मेयर गोपाल हमालके सचिवालयसे ट्रि गार्ड फेकुइया व्यक्तिबारे कौनो जानकारी हुइलेसे खबर कैना आग्रह करले बा । अपन घर आघे रहल बोटबिरुवाके संरक्षण एवं हेरचार करडेनाफे मेयर हमालके सचिवालयसे आग्रह करले बा ।