कैलालीके ७ क्याम्पसके नतिजामे नेविसंघ ४ ओ अखिल क्रान्तिकारी ३ मे विजयी
पहुरा समाचारदाता
धनगढी, ६ चैत । कैलालीमे स्वतन्त्र विद्यार्थी युनियन (स्ववियु) के नयाँ नेतृत्व चयनके लाग निर्वाचन हुइल ७ क्याम्पसके अन्तिम मतपरिणाम सार्वजनिक हुइल बा ।
सार्वजनिक परिणाम अनुसार नेपाली कांग्रेस सम्वद्व नेविसंघसे चार क्याम्पस ओ माओवादी केन्द्र निकट अनेरास्ववियु क्रान्तिकारीसे तीन क्याम्पसमे जित निकरले बा ।
मने नेकपा एमाले निकट अनेरास्ववियुसे कौनोफे क्याम्पसमे जित निकारे सेकल नैहो ।
नेविसंघसे प्यानलसहित धनगढीके फूलबारी बहुमुखी क्याम्पसमे भुवन जोशी, भजनीके मोहन्याल बहुमुखीमे झंकर बुढा, जोशीपुरके रघुनाथ बहुमुखी क्याम्पसमे रञ्जित परियार ओ टिकापुरके विरेन्द्र बहुमुखी क्याम्पसमे गोपाल खत्री जिटले बटै ।
मतगणना जारी रहल धनगढीके ऐश्वर्य बहुमुखी क्याम्पसमेफे नेवि संघ अग्रताण् लेटी रहल बा । ओस्टेक, माओवादी केन्द्र निकट अखिल क्रान्तिकारीसे तीन क्याम्पसमे जिटले बा ।
अखिलसे लम्की बहुमुखी क्याम्पसामे तपेन्द्र प्याकुरेल, बुलबुले बहुमुखी क्याम्पसमे विवेक चौधरी ओ सुखडके राष्ट्रिय कलेजमे सुन्दर गौतम जिटल बटै ।
चौमाला बहुमुखी क्याम्पसके सभापतिमे भर नेविसंघके दिलबहादुर ताम्राकार ओ स्वतन्त्र उम्मेदवार योगेन्द्र कुमार जोशी १२५ बराबर ल्यन्ले बटै । वहाँ नेविसंघसे फेरसे मतगणना हुईपर्ना माग करले बा ।
घोडाघोडी बहुमुखी क्याम्पस ओ वर्दगोरिया बहुमुखी क्याम्पसमे भर तालाबन्दीके कारण स्ववियु चुनाव हुई नैसेकल हो ।
