चैतन्य हाप म्याराथन प्रतियोगिताके तयारी पूरा
पहुरा समाचारदाता
धनगढी, २६ चैत । लावा बरस २०८२ के अवसरमे धनगढीमे हुइना चैतन्य हाप म्याराथन प्रतियोगिताके तयारी लगभग पूरा हुइल बावै ।
धनगढी जेसिसके आयोजनामे अइना बैशाख १ गते लाव बरसके दिन ‘अब धनगढी दौडिन्छ’ कना मूल नारा सहित हाफ म्याराथन प्रतियोगिता हुइ लागल बावै । मंगरके रोज धनगढीमे पत्रकार सम्मेल मार्फत प्रतियोगिताके तयारी पूरा हुइल बारे प्रतियोगिताके संयोजक तथा धनगढी जेसिजके कार्यकारी उपाध्यक्ष दिपक गौतम जानकारी डेलै ।
बैशाख १ गते हुइ लागल ‘अब धनगढी दौडिन्छ’ हाफ म्याराथन प्रतियोगिता ११ औं संस्करण हो । धनगढी जेसिजल सन् २०१४ से यी प्रतियोगिता नियमित रुपमे लावा बरसके दिन आयोजना कैटी आइल बा ।
११औं संस्करणके प्रतियोगिताके मुख्य प्रयोजकके रुपमे धनगढीके चैतन्य पाठशाला रहल बा । मुख्य प्रयोजक हुइल बाफत पाठशाला प्रथम पुरुस्कार अर्थात म्याराथनके बिजेताहे नगद ७५ हजार ओ एक हजार टिसर्ट उपलब्ध करैना जनैले बावै ।
चैतन्य पाठशालाके अध्यक्ष गणेश प्रसाद जोशी म्याराथनके विजेताहे प्रथम पुरुस्कार ओ दौड प्रतियोगितामे भाग लेहुुइया सहभागीहुे एक हजार टिसर्ट उपलब्ध करैना जानकारी डेलै । उहाँ युवाहुक्रनसे आयोजना हुइटी रहल हाफ म्याराथन प्रतियोगितामे जुरे पाके खुशी लागल बटैलै ।
धनगढी जेसिजके अध्यक्ष लोकराज भट्ट मुख्य प्रायोजकके रुपमे साथ डेहलमे चैतन्य पाठशाला परिवारप्रति आभार ब्यक्त करल रहिट ।
प्रतियोगिता १० औं संस्करणसे नेपाल एथलेटिक्स संघबाट स्वीकृत प्राप्त करसेकज आयोजक जनैले बावै । हाफ म्याराथनके विजेता नगद ७५ हजार, उप–विजेता ५० हजार ओ टिसरा हुउइया नगद २५ हजार प्राप्त कैना बाटै । हाफ म्याराथन धनगढी चौराहासे सुरु होके गेटास्थित मनेहरा पुल हुइटी पुनः धनगढी चौराहामे पुगके समापन हुइना संयोजक गौतम जानकारी डेलै ।
ओस्टके, प्रतियोगिता अन्तर्गत महिला ओर तथा कर्पोरेट ओ संचारके ५ कि.मी. दौड आयोजना करजैना जनाइल बावै । संयोजक गौतमके अनुसार विजेता ७ हजार पाँचसय रुपैयाँ प्राप्त कैना बाटै कलेसे उप–विजेता पाँच हजार ओ टिसरा हुउइया दुईहजार पाँचसय रुपैयाँ प्राप्त कैना बाटै ।
खेलकुदके माध्यमसे युवाहे विकासमे प्रोत्साहन कैना उद्देश्यसे आयोजना हुइटी आइल प्रतियोगितामे धावक नेपाली सेना, सशस्त्र प्रहरी, नेपाल प्रहरी लगायतके सहभागिता हुइना आयोजक जनैले बावै ।
लावा बरस २०८१ के अवसरमे आयोजित हाफ म्याराथन प्रतियोगितामे मुकेशबहादुर पाल प्रथम हुइल रहिट । उहाँ २१ किलोमिटर दूरीके हाफ म्याराथन एक घण्टा सात मिनेट ५७ दशमलव ३५ सेकेन्डमे पूरा कैटी प्रथम स्थान प्राप्त करल रहिट ।
