कैलारीमे बालमैत्री स्थानीय शासन कार्यान्वयन योजना निर्माण

पहुरा समाचारदाता
हसुलिया, २३ बैशाख । कैलालीके कैलारी गाउँपालिकामे बालमैत्री बालमैत्री स्थानीय शासन कार्यान्वयन योजना निर्माण कैगिल बा ।

कैलारी गाउँपालिका महिला तथा बालबालिका शाखाके आयोजना तथा सामुदायिक विकास केन्द्र डोटी ओ यूनिसेफके सहयोग सहकार्यमे बालमैत्री स्थानीय शासन सम्बन्धी अभिमुखीकरण कार्यक्रम कैके कार्यान्वयन योजना बनागिल हो ।

स्थानीय बाल समन्वय समितिके संयोजक तथा गाउँपालिका उपाध्यक्ष भगवतीकुमारी चौधरीके अध्यक्षतामे हुइल कार्यक्रममे उहाँ भौतिक पूर्वधारके विकाससंगे सामाजिक मुद्दाहे संगसंगे लैजैना अति आवश्यक रहल बटैली । उहाँ कहली, ‘भौतिक पूर्वाधरके विकास हुइटी रही उ समयके परिस्थितिके माग हो, मने सामाजिक विकासफे बहुट जरुरी बा । कैलारीमे बालमैत्री स्थानीय शासन कार्यान्वयन योजना निर्माण हुइलेसे भविष्यके लाग सम्पति रही ।’

अब्बे बालमैत्री स्थानीय शासन कार्यन्वयन योजना बनैलेसे पाछेसम काम लागी, प्रणालीके विकास हुइना ओ अइना दिनमे काम कैना सहजता प्रदानफे हुइना गाउँपालिका उपाध्यक्ष भगवती चौधरी बटैली ।

अधिवक्ता झंकरबहादुर कुवँर कार्ययोजना निर्माण, बालमैत्री आचारसहिता निर्माण, बालमैत्री स्थानीय शासनके लाग कार्यदल निर्माण सम्बन्धी छलफलमे कराइल रहिट । कार्ययोजनामे संस्थागत, बाल क्लव, खानेपानी शाखा, वडा कार्यालय, महिला तथा वालबालिका शाखा, स्वास्थ्य शाखा अन्र्तगतके टमान मेरिक योजना ओ ओकर लाग प्रस्तावित बजेट निर्माण कैगिल बा ।
कार्ययोजनामे बालमैत्री आचारसहिता निर्माण, बालमैत्री उद्यानसहितके बालमैत्री सिकाई केन्द्र स्थापना, बाल प्रोफाइल निर्माण, बालबालिकास्थिति पत्र तयारी तथा प्रकाशन, बालविकास केन्द्र संचालन मापदण्ड निर्माण ओ कार्यान्वयन, विद्यालयसे बञ्चित बालबालिकाके लाग सीपमुलक तालिम, स्थानीय प्रहरी कार्यालयमे बालमैत्री सम्पर्क इकाई स्थापनाबारे कार्ययोजना ओ बजेट निर्माण कैगिल बा ।

ओस्टेक करके लागु औषध दुव्र्यसनी न्यूनिकरणके लाग सचेतना कार्यक्रम संचालन, जोखिममे परल बालबालिकाहुकनहे स्टेशनरी ओ विद्यालय पोसाक सहयोग, बालविवाह न्यूनिकरणके लाग सचेतनामुलक अभियान संचालन, विद्यालय बाहेर रहल बालबालिकाहुकनहे विद्यालयमे भर्ना कराईपर्ना, घरेलु हिंसा तथा दाइजो प्रथा न्यूनिकरणके लाग सचेतनामुकलक कार्यक्रम संचालन, विद्यालयमे सुझाव पेटिका धारे पर्ना योजना ओ बजेट बनागैल बा ।

ओस्टेक करके बालबालिकाके उज्जवल भविष्य सुनिश्चित करटी ओइनके अधिकारके संरक्षण तथा प्रवद्र्धन कैना लक्ष्यके साथ कैलारी गाउँपालिकासे आंचारसहिता जारी करले बा । बालमैत्री स्थानीय शासन निर्माण कैना उद्देश्यसे सरोकारहुकनके जिम्मेवारी ओ कार्यदायित्व स्पष्ट रुपमे परिभाषित करल बा ।

यी आचारसहितासे बालबालिकाके स्वास्थ्य, शिक्षा, सुरक्षा तथा समय विकासके लाग आवश्यक संरचनात्मक तथा नीतिगत कदम सुनिश्चित कैना मार्गदर्शन प्रदान करी । बालबालिका उप्पर हुइना भेदभाव, शोषण, हिंसा, बालविवाह तथा अन्य कौनोफे मेरिक दुरुपयोगविरुद्ध संरक्षण कैना कहल बा ।

ओस्टेक करके समुदायके सक्कु सरोकारवालाहुकनके सक्रिय सहभागितामार्फत बालबालिकाके जीवनस्तर सुधार कैना ओ दिगो विकासके लाग प्रभावकारी पहल संचालन कैना उद्देश्य यी आंचारसहितसे लेहल बा । यी बालबालिकासंग सम्बन्धी हक ओ कर्तव्यके प्रभावकारी कार्यान्वयनमे निरन्तर सुधार ल्यन्टी ओइनके समृद्धि ओ सुरक्षित स्थान सुनिश्चित कैना महत्वपूर्ण योगदान पुगैना कहल बा ।

आंचारसहिता अभिभावकसे पालना करेपर्नामे स्वास्थ्य सुरक्षा ओ संरक्षण, शिक्षा ओ सिकाई वातावरण, बाल अधिकार सहभागिता ओ सम्मान, भौतिक पूर्वाधार ओ पहुँच रहल बा ।

ओस्टेक बालबालिकाके लाग आचारसहितमे अध्यापन ओ अनुशासन, स्वास्थ्य सुरक्षा रहल बा । विद्यालयसे पालन करेपर्ना संस्थागत आचारसहितामे बालमैत्री वातावरण ओ संरक्षण, शिक्षा पहुँच, समावेशीकरण ओ सहभागिता रहल बा । नीजि क्षेत्रके आचारहितामे लागु पदार्थ जन्य बस्तुके निषेध, बालश्रम निषेध, बाल संरक्षणके सुनिश्चिता रहल बा । ओस्टे राजनीतिकसे पालन करेपर्ना आचारसहिता बनागिल बा । नेपाल प्रहरीके बालबालिकासंग आचारसहितामे बालबालिकासंग मित्रवत व्यवहार, सुरक्षा ओ संरक्षण, बालअधिकारके संरक्षण, सहानुभूति ओ संवाद, समाजसेवी ओ सचेतनापूर्वक पहल, सकारात्मक ओ अनुकुल वातावरण सृजना करेपर्ना कहल बा ।

बालमैत्री स्थानीय शासन गाउँपालिका स्तरीय समितिमे अध्यक्षमे गाउँपालिका अध्यक्ष रना, उपाध्यक्षमे गाउँपालिका उपाध्यक्ष रना, सदस्यमे प्रमुख प्रशासकीय अधिकृत, सक्कु वडा अध्यक्ष, कार्यपालिका सदस्य, शाखाके प्रमुखहुक्रे, गैरसरकारी संस्था रना व्यवस्था रहल बा ।

ओस्टेक करके स्थानीय सरकार संचालन ऐन २०७४ के दफा १४ बमोजिम कार्यदलफे गठन कैगिल बा । कार्यदलके संयोजकमे वडा नम्बर ५ के वडा अध्यक्ष विष्णुप्रसाद चौधरी रहल बटै । सदस्यमे प्रमुख प्रशासकीय अधिकृत खगेन्द्रराज जोशी, स्वास्थ्य शाखाके प्रमुख नरेश चौधरी, बालकल्याण अधिकारी यगम कलेल, शिक्षा शाखा प्रमुख गणेशप्रसाद मिश्र, सदस्य सचिवमे महिला तथा बालबालिका शाखा प्रमुख बालकुमारी चौधरी रहल बटी ।

बालमैत्री स्थानीय शासन कार्यान्वयन योजना निर्माण कार्यक्रममे गाउँपालिका उपाध्यक्ष भगवतीकुमारी चौधरी, प्रमुख प्रशासकीय अधिकृत खगेन्द्रराज जोशी, सक्कु वडाके अध्यक्षहुक्रे, कार्यपालिका सदस्य, सामुदायिक विकास केन्द्र डोटीके कार्यकारी निर्देशक हेमराज जोशी, कार्यक्रम संयोजक तिलक चौधरी, कार्यक्रम अधिकृत करुणा चौधरी, कैलारी गाउँपालिकाके टमान शाखाके प्रमुख, बाल क्लव, विद्यालय व्यवस्थापन समितिके पदाधिकारी, बालकल्याण संघ, सामुदायिक सिकाई केन्द्रके प्रतिनिधिहुकनके सहभागिता रहे ।