चैतन्य विद्यार्थी महोत्सव सुरु

पहुरा समाचारदाता
धनगढी, २२ पुस । कैलालीके धनगढीमे दुसरा चैतन्य विद्यार्थी महोत्सव मंगरके रोजसे सुरु हुइल बा ।

धनगढीमे रहल चैतन्य पाठशालासे महोत्सवके आयोजना करल हो । विद्यार्थी महोत्सवके सुदूरपश्चिम प्रदेशका प्रमुख नजिर मियाँ उदघाटन करलै । उ क्रममे उहाँ मुलुकके विकासमे शिक्षकके भूमिका महत्वपूर्ण रहल बटैलै । देशहे कैसिन जनशक्ति उत्पादन करके डेना कना बाट शिक्षकहुकनके हातमे रहल बटैलै । “विद्यार्थी कहल कच्चे माटी हुइट । अइनहे कैसिन बनैना उ गुरुके हातमे बा” उहाँ कहलै । चैतन्य पाठशालासे संस्कारसहितके शिक्षा डेना बहुट मजा रहल चर्चा करटी प्रदेश प्रमुख मियाँ विद्यार्थीनहे प्राविधिक शिक्षा डेनाफे आग्रह करलै ।

कार्यक्रममे प्रदेशसभा सदस्य धर्मराज पाठक विद्यार्थीनहे तथ्य बाट बुझैना कार्यमे सक्कु विद्यालयसे जोड डेहेपर्ना औंल्यइलै । उहाँ पूर्वीय संस्कृतिहे विज्ञानसँग जोरके आघे बह्रेलेसे विकास हाली हुइना उल्लेख करलै । विद्यार्थीनमे अन्तरनिहीत प्रतिभा उजागरके साथे सृजनशीलता, नेतृत्व क्षमता, सामाजिक चेतना, अन्वेषणशील सोंच ओ आत्मविश्वासके विकास कैना उद्देश्यसे धनगढीके चैतन्य पाठशाला दुसरा चो चैतन्य विद्यार्थी महोत्सव आयोजना करल हो ।

महोत्सवसे विद्यार्थीहुकनके अन्तरनिहीत प्रतिभाके पहिचान, विकास ओ प्रोत्साहन, बौद्धिक, सृजनात्मक, साँस्कृतिक तथा व्यावहारिक सीपके विकास कैना लक्ष्य रहल पाठशालाके कार्यकारी प्रमुख गणेशप्रसाद जोशी बटैलै ।

महोत्सवसे विद्यार्थीके आत्मविश्वास, नेतृत्व क्षमता ओ सार्वजनिक अभिव्यक्ति सुद्धिकरणमे सहयोग कैना उहाँके कहाई बा । महोत्सव उद्घाटन अवसरमे टमान क्षेत्रमे योगदान करल व्यक्तित्वहुकनहे सम्मान करल बा ।

विद्यार्थी महोत्सव पुस २९ गतेसम चल्न जनाइल बा । कार्यक्रममे विद्यालयके शिक्षक अभिभावक संघके अध्यक्ष ईश्वर गिरी, विद्यालयके प्रिन्सिल प्रेम निधि ओझा, विद्यालयके निर्देशक कटकबहादुर सिंहलगायत मन्तव्य राखल रहिट ।

उद्घाटन कार्यक्रममे विद्यार्थीनसे प्रस्तुती, टमान सांस्कृतिक झाँकी ओ प्रभातफेरी कार्यक्रम करल रहे । कार्यक्रमके सञ्चालन विद्यालयके मावि संयोजक हेमा जोशी करले रहैं ।