कालिमाई आविसे सरसफाई कार्यक्रम

पहुरा समाचारदाता
धनगढी, २५ पुस । कैलाली जिल्लाके कैलारी गाउँपालिका वडा नम्बर ४ भित्तरियास्थित श्री कालिमाई आधारभूत विद्यालयसे सरसफाई कार्यक्रम करले बा ।

थारु समुदायके माघ पर्वके अवसरमे उ विद्यालयसे विद्यालय थेनसे भित्तरिया चोकसमके सडक वारपार सरसफाई कार्यक्रम करल विद्यालयके प्रिन्सिपल दशिराम चौधरी जनैलै । उ विद्यालयके सक्कु विद्यार्थीहुक्रे सडक वारपार फेकल फोहर सरसफाई करल रहिट ।

सरसफाईसँगे ट्राफिक नियम, डगर काटेबेर जेब्रा क्रसिङके प्रयोगबारे जानकारी डेहल बा । विद्यालय आईजाईबेर सडक काटेबेर ट्राफिक नियमबारे जानकारी डेहलपाछे सडक दुर्घटनाफे न्यूनिकरण हुइना प्रअ दशिराम बटैलै । कार्यक्रममे विद्यालय व्यवस्थापन समितिके अध्यक्ष भिखराम चौधरीलगायत शिक्षकहुकनफे सहभागिता रहे ।