ग्यालेक्सी माविके ३२औं वार्षिकोत्सव
पहुरा समाचारदाता
धनगढी, १६ माघ । कैलालीके धनगढी उपमहानगरपालिका वडा नम्बर ५ हसनपुरमे रहल ग्यालेक्सी माविके ३२औं वार्षिकोत्सव तथा अभिभावक दिवस सम्पन्न हुइल बा ।
विद्यालय व्यवस्थापन समितिके अध्यक्ष मोहनराज भट्टके अध्यक्षता एवम् वरिष्ट संरक्षणविद डा.हेम सागर बरालके प्रमुख आथित्यमे टमान कार्यक्रम विच भव्यताके साथ कार्यक्रम हुइल हो ।
वार्षिकोत्सवके अवसरमके माघ ८ गतेसे १४ सम विद्यालयसे विद्यार्थीनके लाग टमान अतिरिक्त क्रियाकलापके आयोजना करल रहे । विजेता विद्यार्थीहुकनहे बार्षिकोत्सव समापन कार्यक्रममे पहुनाहुकनसे पुरस्कृत करल रहे ।
यकर साथे गैल बरसके एस.ई.ई. परीक्षामे यी विद्यालयमे उत्कृष्ट जिपिए ३.९६ प्राप्त कैना एन्जेल शाही, दिलिप सिंह ओ दिव्य स्वार ओ एनइबीसे २०८२ सालमे सञ्चालीत कक्षा १२ के वार्षिक परीक्षामे विद्यालयमे उत्कृष्ट जिपिए ३.८६ सहित उत्तीर्ण छात्र क्रिश भट्टहे नगद, प्रमाणपत्र सहित दोसल्लासे सम्मानित करल बा । ओस्टेक करके एमविविएसके लाग सिइई २०८२ सालमे लेहल प्रतिस्पर्धात्मक परीक्षामे पूर्ण छात्रवृत्तिमे नाम निकर्ना सफल छात्र ईश्ववर साउद ओ मिराज ऐरहे फे कार्यक्रममे उहे पुरस्कारसे सम्मानित करल बा ।
उ कार्यक्रममे टमान शिक्षक तथा कर्मचारीफे सम्मानित हुइल बटै । पूर्व सांसद महेश्र पाठक, ऐश्वर्य बहुमुखी क्याम्पसके प्रमुख धर्मदेव भट्ट, सुप क्याम्पसके प्रमुख बुधराम चौधरी, चैतन्य पाठशालाके अध्यक्ष गणेश प्रसाद जोशीलगायतसे टमान खेलकुदमे विजेता विद्यार्थीहुकनहे पुरस्कार वितरण कैनाके साथे शुभकामना मन्तव्य राखल रहिट ।
कार्यक्रममे टमान विद्यालयके प्रिन्सिपल, टमान क्षेत्रके बुद्घिजीवि, पत्रकारके साथे अभिभावकहुकनके उपस्थिति रहे । उ कार्यक्रममे विद्यार्थीहुकनहे नृत्यफे प्रदर्शन कैगिल रहे ।
