एसईई ग्रेडवृद्धि परीक्षामे ६४.६९ प्रतिशत विद्यार्थी उत्तीर्ण
पहुरा समाचारदाता
काठमाडौं, २३ असार । राष्ट्रिय परीक्षा बोर्डसे माध्यमिक शिक्षा परीक्षा (एसईई) २०८२ के ग्रेडवृद्धि (पूरक) परीक्षाके नतिजा सार्वजनिक करले बा ।
बोर्डके अनुसार ग्रेडवृद्धि परीक्षामे १ लाख २९ हजार ११४ जाने विद्यार्थी सहभागी हुइल रहिट । उ मध्ये ८३ हजार ५२३ जाने उत्तीर्ण हुइल बटै । यी कुल सहभागीके ६४.६९ प्रतिशत हो ।
जीपीएअनुसार सबैसे ढेर ५१ हजार ४३८ विद्यार्थी २.४० से २.८० सम जीपीए प्राप्त करले बटै ।
ओस्टेक १६ हजार ४६७ जाने २.८० से ३.२०, १४ हजार ३६२ जाने २.०० से २.४०, १ हजार १९५ जाने ३.२० से ३.६०, ४५ जाने १.६० से २.०० तथा १६ जाने ३.६० से ४.०० जीपीए हासिल करले बटै । ०.८०–१.२० ओ १.२०–१.६० जीपीए प्राप्त कैना विद्यार्थी भर नैहुइट ।
बोर्डसे नतिजा वेबसाइट, आईभीआर तथा एसएमएस÷यूएसएसडी सेवामार्फत हेरे सेक्ना जनैले बा । नतिजामे चित्त नैबुझलेसृ पुनर्योगके लाग बोर्डसे तोकल अवधिभिटर अनलाइनसे आवेदन डेहे सेक्ना व्यवस्थाफे करल बा ।
यिहेबीच, परीक्षा मर्यादा विपरीत कार्य करल आरोपमे केन्द्राध्यक्षसे सिफारिस हुइल ७ जाने परीक्षार्थीके परीक्षा रद्द करल बोर्ड जनैले बा ।
