तनुजके हत्या करके लुटल सुनके मुन्द्रा खेमराजके घरसे बरामद
पहुरा समाचारदाता
धनगढी, २३ असार । धनगढीमे १० वर्षीया बालक तनुज चौधरीके हत्या करके लुटल सुनके मुन्द्रा प्रहरी बरामद करल बा । गैल असार १२ गते धनगढी–१७ के कालिका सामुदायिक वनमे मृत फेला परल तनुजके कानमे लागैल सुनके मुन्द्रा सोम्मरके रोज पक्राउ परल अभियुक्त खेमराज कठायतसे बरामद हुइल हो ।
प्रहरीके अनुसार तनुजके हत्यामे संलग्न हुइल गौरीगङ्गा नगरपालिका–६ के २५ वर्षीय कठायत लागुऔषध दुव्र्यसनी रहल ओ पैसाके लग उहे बालकके हत्या करके कानमे लागइल एक आना बराबरके सुनके मुन्द्रा लुट रहे । खेमराजसे प्रारम्भिक बयानमे अपने सुनके मुन्द्रा लुटल स्वीकार करल जिल्ला प्रहरी कार्यालय कैलालीसे जनैल बा ।
प्रहरीके अनुसार तनुजके हत्यापाछे खेमराजसे सुनके मुन्द्री निकरके पेन्टके खल्तीमे लुकाइल रहे । मंगरके रोज कठायतके घरसे उहे सुनके मुन्द्रा बरामद हुइल कैलाली प्रहरी प्रवक्ता प्रहरी नायब उपरीक्षक योगेन्द्र तिमिल्सिना बटैलै । तनुज १० असारमे घरसे बेपत्ता हुइल रहे । खोजतलासके क्रममे घर लग्गेक सामुदायिक वनमे उहाँके शव फेला परल रहे ।
खेमराजहे कैलाली प्रहरीसे सोम्मरके रोज साँझ धनगढी–२ भन्सार रोड क्षेत्रसे नियन्त्रणमे लेहल हो । उहाँ भारत प्रवेश कैना क्रममे पक्राउ परल प्रहरी जनैले बा । जिल्ला प्रहरी कार्यालय कैलालीमे कार्यरत प्रहरी नयाब निरीक्षक सुशील चन्दके नेतृत्वमे खटल प्रहरीे टोलीसे खेमराजहे घटना हुइल १० दिनपाछे पक्राउ करल हो । घटनाबारे थप अनुसन्धान हुइटी प्रहरी जनैले बा ।
