कञ्चनपुरमे पूर्ण खोप सुनिश्चित जिल्ला घोषणा

पहुरा समाचारदाता
कञ्चनपुर, २५ असार । कञ्चनपुरहे ‘पूर्ण खोप सुनिश्चित ओ दिगोपना जिल्ला’ घोषणा करल बा । राष्ट्रिय खोप कार्यक्रमअन्तर्गत जिल्लाके नौ ठो पालिकाके सक्कु बालबालिकाहे नियमित ओ छुट खोपके पहुँचमे ल्याइलपाछे पूर्ण खोप सुनिश्चित ओ दिगोपना घोषणा करल हो ।

जिल्ला समन्वय समितिके प्रमुख दुर्गादत्त बोहरासे पूर्ण खोप सुनिश्चितता जिल्ला घोषणा करटी बालबालिकाहे खोपसे रोकथाम कैना सेक्ना ओ रोगसे सुरक्षित राख्ना महत्वपुर्ण उपलब्धि हासिल हुइल बटैलै । उहाँसे घोषणा केवल उपलब्धिमे सीमित नैहुके आगामी दिनमे फे नियमित खोप सेवाके दिगोपनामे विशेष ध्यान देहेकपर्ना जोड देलै ।

स्वास्थ्य कार्यालयके अधिकृत जनक कुँवरके अनुसार जिल्लाभर रहलके १६८ खोप केन्द्रमार्फत शून्यसे १५ महिनासमके ८ हजार ६३७ बालबालिकाहे नियमित खोप सेवा प्रदान करल बा । ओस्टेक, विगतमे खोप लगैना छुटल १३८ बालबालिकाहे फे बिसिजी, ओपिभी, पिसिभी, रोटा, एफआइपिभी, दादुरा–रुबेलालगायत आवश्यक खोप लगैना उहाँ बटैलै ।

जन्मसे ११ महिनासमके सात हजार ९८८, ११ से २३ महिनासमके सात हजार ८७७ बालबालिका, नौ हजार ४२७ गर्भवती ओ २४ से ५९ महिनासमके सक्कु लक्षित बालबालिकाहे आवश्यक खोप प्राप्त करके अधिकृत कुँवरसे बटैलै ।
कार्यक्रममे खोप अभियानमे योगदान पुगल टमान पालिकाके खोप सहजकर्ता ओ स्वास्थ्यकर्मीहे सम्मान करल रहे ।