चलचित्र भागदौड प्रदर्शनमे
पहुरा समाचारदाता
धनगढी, २६ असार । चलचित्र भाडदौड शुकके रोजसे प्रदर्शनमे आइल बा । यी चलचित्र देशभरके हलमे एकसाथ प्रदर्शनमे आइल बा । चलचित्रके मुख्य भूमिका धनगढी उपमहानगरपालिकाके शिवनगर घर रहल कलाकार घनश्याम जोशी तथा दुसर मुख्य कलाकारमे विशाल पोखरेल बटै ।
धनगढीके एसटीएस सिनेमा हलमेफे चलचित्र भाडदौड प्रदर्शन हुइटी रहल बा । यी सिनेमासे जीवनके भागदौडके कथा कहठ । अर्थात आममनैनके जीवनके दौडधुपहे चलचित्रके पर्दामे उटारल बा । जीवनके संघर्ष ओ यथार्थ बोकल हास्यव्यङ्ग्य प्रधान चलचित्र भागदौडसे सन्देशफे डेहल बा ।
कलाकार जोशीसे यी चलचित्रमे दर्शकहे हसैना ओ ‘इमोसनल’ बनैना ‘सिन’ रहल बटैलै । आम मनैनके जीवनके दुख, पीडा ओ भोगाइके विषबस्तुहे चलचित्रमे डेखाई खोजल उहाँ जानकारी डेलै । चलचित्रसे नेवारी संस्कृतिहे जोरके आममनैनके यथार्थ ओ संघर्ष प्रस्तुत करले बा ।
नेवारी संस्कृतिहे जोरके १० कक्षा पास करलपाछे इन्जिनियरिङ पह्रे चाहल एक युवतीसे अपन सपनाा पुरा कैना करल संघर्षहे कथानक बनाइल बा । युवतीके संघर्षमे समाजहे प्रभाव पारे अइना पात्रके रुपमे जोशी डेखल बटै । समाजमे डेखल विकृति नियन्त्रण कैना दायित्व बोकल सुरक्षाकर्मीके रुपमे पोखरेल बटै । चलचित्रसे समाजके ऐना डेखाइल दुसर कलाकार पोखरेल बटैलै । समाजके संस्कार, संस्कृति बोकल यी चलचित्र नेपाली माटी सुहैटी रहल उहाँ बटैलै ।
जोशी ओ पोखरेलसंगे चलचित्रमे अनिषा श्रेष्ठ, शारदा राइ, शेखर चापागाइलगायत कलाकार प्रमुख भूमिकामे बटै । ओस्टे देशभक्त खनाल, लक्ष्मी गिरी, शंकर, महर्जन, सुशास तिमिल्सिनाजैसिन सिनेमाके पर्दामे स्थापित कलाकारहुकनके अभिनय रहल बा ।
यी चलचित्र सुप्रिम म्युजिक एण्ड फिल्म प्रालिके प्रस्तुति हो । विश्वराम बिष्टसे निर्माण करल चलचित्रके लेखन तथा निर्देशन हिमाल उप्रेतीसे करल हुइट । चलचित्रके गीतमे बसन्त सापकोटा ओ प्रकाश नेपालीके संगित भरले बटै कलेसे गीतके लेखन बसन्त सापकोटा ओ निर्देशक उप्रेती करले बटै । गीतमे मिलन नेवार, अस्मिता अधिकारी ओ प्रल्हाद तिमिल्सिनाजैसिन लोकप्रिय गायकगायिकाके स्वर डेहल बटै ।
धनगढी घर रहल जोशी नेपाली सिने क्षेत्रके स्थापित कलाकार हुइट । उहाँ दर्जनौँ चलचित्र, टेलिसिरियल, विज्ञापन आदिमे मुख्य कलाकारके भूमिकामे अभिनय करसेकल बटै ।
