चैतन्यसे भानु जयन्तीके अवसरमे कविता वाचन प्रतियोगिता
पहुरा समाचारदाता
धनगढी, २८ असार । २१३औँ भानु जयन्तीके अवसरमे चैतन्य पाठशालामे अन्तर विद्यालय कविता वाचन प्रतियोगिता–२०८३ सम्पन्न हुइल बा ।
कैलाली कञ्चनपुर क्षेत्रके १६ विद्यालयके सहभागिता रहल रहे । चैतन्य पाठशालाके सभा हलमे आयोजित कार्यक्रममे चैतन्य पाठशालाके शिक्षक अभिभावक सङ्घके अध्यक्ष ईश्वर गिरी सभापति रहल रहिट । सुदूरपश्चिम साहित्य समाजके अध्यक्ष तथा साहित्यकार रामलाल जोशी प्रमुख अतिथि रहल रहिट ।
कैलाली कञ्चनपुरके १६ विद्यालयके २९ जाने विद्यार्थी सहभागिता रहल कार्यक्रममे उत्कृष्ट प्रस्तुति डेहुइया विद्यार्थीहे नगद पुरस्कारसहित सम्मान करल बा । अन्तर विद्यालय कविता प्रतियोगितामे चैतन्य पाठशालाके छात्रा सन्ध्या अवस्थी प्रथम, डिस्कोभरि स्कुलसे शिशिर ओझा द्वितीय, माइल स्टोन स्कुलके अनुजा चौधरी तृतीय, ओ पञ्चोदय माबिसे अञ्जली धानुक सान्त्वना स्थान हात पारल बटै ।
प्रथम, द्वितीय, तृतीय ओ सान्त्वना स्थान हात परुइयार्हे क्रमशः ५१०५, ३५०५,२००५,१००५ रुपैयाँ ओ प्रमाण पत्र सहित पुरस्कार प्रदान करल रहे । साथे, सहभागिता जनाइल सक्कु २९ जाने विद्यार्थीहुकनहे प्रमाणपत्र प्रदान करल रहे ।
कार्यक्रममे कैलाली बहुमुखी क्याम्पसके उप–प्राध्यापक डा.वासुदेव बिष्ट, सह प्राध्यापक गणेश राज जोशी ओ साहित्यकार कोपिला शर्मा निर्णायकके रूपमे रहल रहिट ।
कार्यक्रममे बोल्टी विद्यालयके निर्देशक कटक बहादुर सिंह नेपाली भाषा ओ साहित्य हमार राष्ट्रिय सम्पदा हुइल कहटी यकर संरक्षण ओ प्रवर्धन सक्कुहुनके साझा जिम्मेवारी रहल उल्लेख करलै । उहाँक यसिन प्रतियोगितासे विद्यार्थीमे भाषिक क्षमता विकास कैना ओ साहित्यिक अभिरुचि बह्रैना हुइल ओरसे चैतन्यसे यैसिन कार्यक्रमहे आउर आयोजना करटी जैना बटैलै ।
आँखीसे नैडेखल बाट समेत साहित्यसे प्रकाश पर्ना कार्यक्रममे प्रमुख अतिथि रहल साहित्यकार रामलाल जोशीके कहाई रहे । उहाँ “आजके कार्यक्रमके उपस्थिति ओ कार्यक्रममे प्रस्तुत हुइल रचनासे अब्बेक युवा पुस्तामे साहित्यप्रतिके मोह झल्काइल ओ विद्यालयस्तरमे अटराके प्रस्तुतिसे अपनहे खुसी लागल बटैलै ।
कार्यक्रममे धन्यावाद ज्ञापन करटी पाठशालाके शिक्षक अभिभावक संघके अध्यक्ष ईश्वर गिरी आज पाठशालासे कवि भानुभक्त आचार्यके योगदानके कदर ओ उहाँके बिचारके उजागर कैना उद्देश्यसे कार्यक्रम आयोजना करल बटैलै । भानुभक्तके देश प्रेम ओ समाज प्रेमके बिचार ओ डगरमे नेंगथे सेक्नामे देशहे समेत योगदान पुग्न बटैलै ।
भानुभक्तके समाजप्रतिके योगदान उदाहरणीय रहल व्यक्त करलै । एक ठो घाँसीसे सिखल शिक्षासे भानुभक्त आदिकवि बने सेक्ठै कना हम्रे समेत सिक्न बाटमे हरदम तत्पर रहेपर्ना शिक्षा भानुभक्तसे डेहल उहाँक कहाई रहे ।
चैतन्य पाठशालासे समेत यैसिन कार्यक्रम मार्फत समाजमे सकारात्मक सन्देश डेहुइया अग्रज व्यक्तित्वहुकनके बारेमे जानकारी करैना ओ ओइने जस्टे सचेत नागरिक बन्न अभिप्रेरित कैना लक्ष्य राखल उहाँ बटैलै ।
