कञ्चनपुरमे कुटपिटसे गोसिनीयाके मृत्यु

पहुरा समाचारदाता
कञ्चनपुर, ३२ असार । कञ्चनपुरमे गोसियाके कुटपिटसे गोसिनीयाके मृत्यु हुइल बा । घटनापाछे गोसियाहे प्रहरी पक्राउ करल बा । दोधाराचाँदनी नगरपालिका–१० फगिरे चौराहामे ४५ वर्षीय रनबहादुर सुनारसे अपन ४२ वर्षीया गोसिनीया पारु सुनारहे कुटपिट करल रहे ।

कुटपिटमे घाहिल हुइल उहाँहे दोधाराचाँदनी अस्पतालमे उपचार करल रहे । बुधके रोज किल अस्पतालसे डिस्चार्ज हुइल पारुके बिफेक बिहान मृत्यु हुइल प्रहरी जनैले बा ।

उहाँके मृत्युपाछे गोसिया रनबहादुरहे इलाका प्रहरी कार्यालय दोधारासे पक्राउ करल बा । उहाँहे नियन्त्रणमे ढारके थप अनुसन्धान हुइटी रहल प्रहरी जनैले बा ।