कञ्चनपुरमे बेम्टी खोजे गिलबेला हेराइल १४ महिला सम्पर्क आइलै
पहुरा समाचारदाता
कञ्चनपुर, ४ सावन । कञ्चनपुरमे बेम्टी खोजे गिलबेला हेराइल १४ महिला सम्पर्क आइल बटै । अटवारके रोज ११ बजेसे उहाँहुक्रे सम्पर्क विहीन हुइल रहिट । शुक्लाफाँटा निकुञ्जमे बेम्टी खोजे गिल बेला हेराइल ओइनहे खोजेबेर ३ जानेहे तुरुन्त फेला परहल रहिट कलेसे १४ जाने भर रातभर रहिके सोम्मारके रोज अपनही घर आइल बटै ।
महिलाहुकनके खोजीमे प्रहरी ओ सैनिक टोली खटल रहिट । भीमदत्त नगरपालिका–१९ के बागफाँटा घर रहल महिलाहुकनके खोजी हुइ रहल सुदूरपश्चिम प्रदेश प्रहरी कार्यालयके एसएसपी पदम विष्ट बटैलै । उहाँके अनुसार शुक्लाफाँटा राष्ट्रिय निकुञ्जमे परिचालित सेनाके टोलीसे उहाँहुकनके खोजी कार्य करल रहे ।
सम्पर्कविहीन हुइल महिलाहे निकुञ्जके मालुमेला पोष्टसे निकुञ्जमे छिरल पटा पाइल रहिट । सम्पर्कविहीन हुइलमे सकनी चौधरी, सविता चौधरी, सानी चौधरी, सकिया चौधरी, रमा चौधरी, लक्ष्मी चौधरी, मनीषा चौधरी, रिता चौधरी, सुनिता चौधरी, विमला आग्री, सुमित्रा सुनार, शान्ति सुनार, प्रतीक्षा सुनार ओ सिवानी सुनार रहिट ।
उहाँहुकनसंगे गिल ३ जाने अपन परिवारहे फोन करल पाछे प्रहरी उहाँहुकनहे उद्धार करल रहिट ।
