डा. गोपाल दहित लगायत आठ जाने सम्मानित हुइना

पहुरा समाचारदाता
बर्दिया, ८ अगहन । जंग्रार साहित्यिक बखेरीक १० औं बर्सगाँठक ब्यालम थारु भाषा, साहित्य ओ संस्कृतिम उल्लेखनीय योगदान डेलक कटि पूवमन्त्री डा. गोपाल दहितहँ सम्मान कैजिना हुइल् बा । सम्मान कार्यक्रम बखेरीक १०औं बर्सगाँठ यिह पुस ३ व ४ गतेक डिन ठाकुरद्धारा बर्दियम रलक थारु होम रिसोर्टम कैजिना आयोजक संस्था जानकारी करैल बा ।

यि सम्मानक ब्यालम जिल्लागत हिसाबले बर्दियासे साहित्यकार सन्तराम धारकटुवा थारु, लेखिका तथा गायीका सुमित्रा चौधरी, लेखक तथा पत्रकार एकराज चौधरी, कैलालीसे लेखक दिलबहादुर चौधरी ओ साहित्यकार शर्मिला चौधरी ‘सृष्टी’, दाङ्गसे लेखक श्रीराम चौधरी ओ सुर्खेतसे साहित्यकार मान बहादुर पन्नाहँ सम्मान कैजिना जंग्रार साहित्यिक बखेरीक अध्यक्ष सोम डेमनडौरा जनैल बाट ।

जंग्रार साहित्यिक बखेरीक जरम ब्याला ठेसे आब्बसम् संस्थक उद्देश्य अनसार डर्जनसे ढ्यार थारु भासक पोस्टा निकर्लक ओ थारु भासा साहित्यक संरक्षण ओ प्रवद्र्धनक लाग खन्गर खन्गर अभियान चलाक थारुभासी साहित्यकार जर्मैलक बाट संस्थक संस्थापक संरक्षक सुशील चौधरी जनैल बाट । वहाँ कठ, जंग्रार साहित्यिक बखेरीक जरम पाछ थारु साहित्यम गुणात्मक विकास हुइलक ओ संगसंग कैयौठो साहित्यिक संस्था फे जुर्मुरैलक ओ पोष्टा फे महाढ्यार सिर्जल ।

पुसक ४ गते मनाई जैटि रलक १०औं बर्सगाँठक मौकम बट्कोही लेखन डब्नीभिराउ ओ समीक्षा समेत कर्जिना अध्यक्ष सोम डेमनडौरा जनैल बाट । उहाँ आघ ठप्ठ, लग्ढार थारु भासा ओ साहित्यक लाग काम कर्टि अइलक जंग्रार साहित्यिक बखेरीक यि फ्यारा रणनीतिक योजना बनैना ओ पुरुस्कार समेत स्थापना कर्ना बनैल बाटी । याकर लाग सम्बन्धित सक्कु साहित्यप्रेमी थारु भासा, साहित्यक लाग योगदान डिह पुरुस्कार स्थापनक लाग योगदान कर अरजी फे कैगिल् जनैल बटै ।