सपना बन्ली बीबीसीके १०० प्रभावशाली महिला

काठमाडौं, ९ अगहन । बीबीसीके प्रभावशाली सय महिलाहुकनके सूचीमे नेपालके सपना रोका मगरफे परल बाटी । बेलायती सञ्चारमाध्यामे बीबीसीसे प्रत्येक वर्ष प्रकाशित कैना विश्वके प्रभावशाली सय महिलाहुकनके सूचीमे सपना परल हुइट ।

म्याग्दी जिल्लाके सपना सडक ओ गल्ली किनारमे भेटल बेवारिसे शवहुकनके व्यवस्थापन करटी आइल लउण्डी हुइट ।

बेवारिसे शवके व्यवस्थापनके काम करटी आइल संस्थामे कार्यरत उहाँ अभिनसम ३ सयसे ढेर बेवारिसे शवहुकनके व्यवस्थापन करटी बाटी । सडकमे अलत्रप परल शव अस्पतालमे लैजाके पोष्टमार्टम कैनासे पशुपति आर्यघाटमे लैजाके संस्कारअनुसार अन्त्येष्टि कैना काममे सपना निरन्तर खटटी रहल बाटै ।

सपनासंगे विश्वके टमान क्षेत्रमे कार्यरत और महिलाफे सयजानेक सूचीमे परल बाटै । बीबीसीसे प्रत्येक वर्ष ओसिन प्रभावशाली ओ प्रेरणादायी महिलाके सूची प्रकाशित करटी आइल बा ।