गोदावरी नगरपालिकासे विद्यालय खोल्न मापदण्ड तयार

पहुरा समाचारदाता
अत्तरिया, ९ अगहन । कैलालीके गोदावरी नगरपालिकासे विद्यालय खोल्न मापदण्ड तयार पारले बा ।

नगरपालिकाके शिक्षा, युवा तथा खेलकुद शाखासे स्वास्थ्य सुरक्षा मापदण्ड अनुसार विद्यालय खोल्न सम्बन्धित निकायहे निर्देशन फेन डेले बा । नगरपालिकासे जारी करल सुचना अनुसार संक्रमणके जोखिम, विद्यार्थी संख्या तथा उपलव्ध भौतिक पुर्वाधार व्यवस्थापन कैके विद्यालय खोले पर्ना जनैले बा ।

विद्यालय सञ्चालन करेबर शिक्षक, कर्मचारी, विद्यार्थी तथा अभिभावकहुक्रे अनिवार्य मास्क लगाइ पर्ना रहल बा । भौतिक दुरी मिलाके बैठ्ना, खाजा व्यवस्थापन कैना लगायतके बिषय अभिभावक संग सकहकार्य करे पर्ना बा ।

नगरपालिकासे विद्यालयलाहे सक्कु कक्षा ओ विद्यार्थीहे अक्के समय कक्षा संचालन कैना, अलग–अलग (सिफ्ट) मे अलग अलग कक्षा वा तह संचालन कैना, विद्यालय खुल्ना तथा कक्षा संचालनके अवधि घण्टी छोट्याइना, अवस्था हेरके टर्का कक्षाहे पहिल वा उपर्का कक्षाके विद्यार्थीहे पहिल (जोखिम ओ सहजता हेरके) कक्षा सुरु कैना लगायतके विकल्प डेहल बा ।