हुलाकी सडकः ४५ महिनामे १४ किमी सडक कालोपत्र
कञ्चनपुर, १० अगहन । कञ्चनपुरके दक्षिण क्षेत्र जोरना हुलाकी सडकके निर्माण कार्य सुस्तगतिमे आघे बह्रल बा । निर्माण कम्पनीके लापरबाहीके कारण उ सडकके निर्माण कार्य सुस्तगतिमे आघे बह्रल हो । २०७३ साल फागुनमे ३० महिनाभिटर निर्माण सेक्न करके ६२ किलोमिटर हुलाकी सडक तीन ठो प्याकेजमे ठेक्का डेहल हुइलेसेफे दुई चो सम म्याद ठप करेबेरफे निर्माण पूरा हुई नाइसेकल हो ।
हुलाकी राजमार्ग योजना कार्यालय कैलालीके सूचना अधिकृत इञ्जिनियर पदमबहादुर मडै निर्माण कम्पनीके लापरबाहीके कारण काममे ढिलाइ हुइल बटैलै । ‘तीनु प्याकेजमे करके अभिनसम साढे १३ किलोमिटर केल सडक कालोपत्र हुइल बा’, उहाँ कहलै,‘टिसरा खण्ड (बेल्डाँडीसे दैजीसम) मे निकुञ्जके प्रक्रिया मिलाईबेर एक वर्ष ढिला सुरु हुइल रहे ।’
उहाँक अन्सार सडक निर्माणके लाग ठेक्का हुइल चार वर्ष पुगे लग्लेसेफे अभिन काम दुर्त गतिमे विल्गाइल नइहो । तीनु प्याकेजमे करके ७० प्रतिशत काम सेकल बा । डोकेबजारसे बेलौरीसमके २० किलोमिटर ओ बेल्डाँडीसे दैजीसमके २२ किलोमिटर हुलाकी सडक निर्माणके जिम्मा शर्मा–राजेन्द्र जेभी पैले रहे । अन्तिम प्याकेज (बेल्डाँडीसे दैजीसम) के भाग शुक्लाफाँटा राष्ट्रिय निकुञ्जमे पर्ना हुइल ओरसे रूखुवा कटान प्रक्रिया कारण कुछ ढिलाइ हुूइल उहाँक कहाई बा ।
ओस्टेक करके, बीचमे पर्ना बेलौरीसे बेल्डाँडीसमके २० किलोमिटर निर्माणके जिम्मा बाबा–हंश सिद्धिसाइँ जेभी पाइल हुइलेसेफे निर्माणके गति भर सन्तोषजनक नइहो । दुसरा प्याकेजमे एक हजार २०० मिटर सडकमे नेपाल–भारत सीमा विवाद हुइल ओरसे उहाँक काम अन्तिममे कैना कहिके और ठाउँमे काम हुइटी बा’, सूचना अधिकृत मडै कहलै, ‘उ सडक भारतीय पक्षसे अपन दाबी करटी रहल ओरसे ओकर टुङगो नइहुइल हो ।’
एक अर्ब नौ करोडसे ढेर लागतके उ आयोजना समयमे सम्पन्न नइहुके दक्षिण क्षेत्रके नागरिक सास्ती खेपे परल बा । पहिल चो म्याद आठ महिना ठपल रहे । दुसरा चो म्याद एक वर्ष ठप्न कहल बा । निर्माण कम्पनी आठ महिनामे सेक्ना कहल मने उ अभिन पूरा नइहुइल हो ।
‘पहिल ओ टिसरा खण्डके म्याद गैल सावनमे सेकल कलेसे दुसरा खण्डके कामके अवधि यी महिना केल बा’, इन्जिनियर मडै कहलै, ‘पहिल खण्डके अइना माघसम म्याद ठप हुइलेसेफे दुसरा ओ टिसरा खण्डके ठपल नइहो ।’ गैल चैत यहोर कोरोना कहरके कारण हुइल बन्दाबन्दीसेफे निर्माण कार्य प्रभावित बने पुगल हुलाकी राजमार्ग योजना कार्यालय जनैले बा । ‘चैत, वैशाख ओ जेठमे कालोपत्र करजाए’, सूचना अधिकारी मडै कहलै, ‘अवसिक कोरोनाके कारण उ समयमे काम करे नइसेक्गिल ।’
