प्रदेश सरकारके पहिल चौमासिकके खर्च ६.२९ प्रतिशत
पहुरा समाचारदाता
धनगढी, १० अगहन । सुदूरपश्चिम प्रदेश सरकारके चालु आर्थिक बर्षके पहिल चौमासिक (कार्तिक मसान्त) सम २ अर्ब ९ करोड ८६ लाख २६ हजार (६.२९ प्रतिशत) खर्च हुइल जनागिल बा ।
आर्थिक मामिला तथा योजना मन्त्रालय सुदूरपश्चिम प्रदेशसे आज धनगढीमे पत्रकार सम्मेलनके आयोजना करके चालु तथा पुँजीगत ओर विनियोजित बजेटके खर्च ओ राजश्व संकलनके अवस्थाबारे जानकारी डेले बा ।
चालु आर्थिक बर्ष २०७७/०७८ के कुल बजेट ३३ अर्ब ३८ करोड १३ लाख ५८ हजार मन्से पहिल चौमासिक (कार्तिक मसान्त) सम २ अर्ब ९ करोड ८६ लाख २६ हजार (६.२९ प्रतिशत) खर्च हुइल आर्थिक मामिला तथा योजना मन्त्री झपट बोहोरा बटैलै ।
कुल विनियोजन बजेट मन्से चालु ओर १ अर्ब १० करोड ४७ लाख ५० हजार ओ पुँजीगत ओर ९९ करोड ३८ लाख ७६ हजार करके २ अर्ब ९ करोड ८६ लाख २६ हजार खर्च हुइल उहाँ बटैलै ।
चालु आर्थिक बर्ष २०७७/०७८ के पहिल चौमासिक समके खर्चहे गैल आर्थिक बर्ष २०७६/०७७ के उहे अवधिके खर्चसंग तुलना करेबेर खर्च रकमके आधारमे ६४.४५ प्रतिशतसे बृद्धि हुइल मन्त्री बोहोरा जनैलै ।
चालु आर्थिक बर्षमे राजश्वके लक्ष्य ६७ करोड ७० लाख ३० हजार रहलमे आर्थिक बर्ष २०७७/०७८ के पहिल चौमासिक अवधिसम ३१ करोड ९ लाख ६६ हजार राजश्व आम्दानी हुइल जनागिल बा । जौन लक्ष्यके तुलनामे ४५.९३ प्रतिशत हुइना आइठ, जबकी २०७६/०७७ के उहे अवधिमे ३२.१२ प्रतिशत केल राजश्व संकलन हुइल रहे । असिक आर्थिक बर्ष २०७६/०७७ से चालु आर्थिक बर्षके समिक्षा अवधिमे १३.८१ प्रतिशतसे ढेर राजश्व संकलन कैना सफल हुइल मन्त्रालय जनैले बा ।
सुदूरपश्चिम प्रदेश सरकारके प्रदेश सभा सचिवालयके चालु आर्थिक बर्ष २०७७/०७८ के कुल बजेट १९ करोड १० लाख ६४ हजार मन्से ३ करोड ७२ लाख ८२ हजार (१९.५१ प्रतिशत), मुख्यमन्त्री तथा मन्त्री परिषद कार्यालयके कुल बजेट १ अर्ब ७८ करोड ९२ लाख ७७ हजार मन्से २ करोड ३० लाख १ हजार (१.२९ प्रतिशत) बजेट खर्च हुइल पत्रकार सम्मेलनमे जानकारी डेहल बा ।
ओस्टेक आर्थिक मामिला तथा योजना मन्त्रालयके कुल बजेट १ अर्ब ६४ करोड २४ लाख ३० हजार मन्से १ करोड ३२ लाख ६५ हजार (०.८१ प्रतिशत), उद्योग पर्यटन वन तथा वातावरण मन्त्रालयके कुल बजेट २ अर्ब ७८ करोड १० लाख ९ हजार मन्से २० करोड ७२ लाख ६३ हजार (७.४५ प्रतिशत) खर्च हुइल बा ।
प्रदेश सरकारके भुमि व्यवस्था कृषि तथा सहकारी मन्त्रालयके चालु आर्थिक बर्ष २०७७/०७८ के कुल बजेट ३ अर्ब ३३ करोड ३१ लाख ३२ हजार मन्से पहिल चौमासिकसमके खर्च १४ करोड ३० लाख ८३ हजार (४.२९ प्रतिशत) रहल बा । आन्तरिक मामिला तथा कानून मन्त्रालयके कुल बजेट ४६ करोड ८६ लाख १ हजार मन्से ४ करोड १६ लाख ५ हजार (८.८८ प्रतिशत), भौतिक पूर्वाधार विकास मन्त्रालयके कुल बजेट ११ अर्ब १० करोड ५३ लाख ३ हजार मन्से ९१ करोड ५९ लाख ८५ हजार (८.२५ प्रतिशत) खर्च हुइल जनागिल बा ।
ओस्टेक सामाजिक विकास मन्त्रालयके कुल विनियोजित बजेट मन्से ६ अर्ब ६२ करोड ६६ लाख ६३ हजार मन्से ५३ करोड ५४ लाख ६६ हजार (८.०८ प्रतिशत) खर्च हुइल बा । प्रदेश सरकारके वित्तीय व्यवस्थाके लाग छुटयाइल कुल बजेट ३० करोड ओ अर्थ विविधके लाग छुटयाइल ३ अर्ब ८८ लाख ६९ हजार मन्से खर्च शुन्य रहल बा ।
वित्तीय हस्तान्तरण स्थानीय तहके लाग चालु आर्थिक बर्ष २०७७/०७८ मे कुल बजेट २ अर्ब १३ करोड ५० लाख छुटयाइल मन्से १८ करोड १६ लाख ६७ हजार (८.५१ प्रतिशत) रुप्या हुइल मन्त्रालय जनैले बा ।
