नेकपा सरकार चलाइ नाइ सेक्लेसे कांग्रेस जिम्मेवारी लेना तयार : नेता बलायर
पहुरा समाचारदाता
धनगढी, ११ अगहन । नेपाली काँग्रेसके केन्द्रीय सदस्य तथा पुर्वमन्त्री वीरबहादुर बलायर नेकपा सरकार चलाइ नाइ सेक्लेसे सरकार चलैना काँग्रेस तयार रहल बटैले बाटै । नेकपा सरकारसे अजित होके जनता काँग्रेसहे गुहरटी रहल समेत बटैलै ।
नेपाल प्रेस युनियन कैलालीसे बिफेक रोज धनगढीमे आयोजना करल पत्रकार सम्मेलनमे उहाँ ओइसन बटाइल हुइट । जनता कम्न्युष्ट पार्टीहे ढिउर जनमत डेके सरकारमे पुगैलै मने, जनभावना अनुरुप काम करे नाइ सेकल उहाँके कहाइ रहे । उहाँ वर्तमान नेकपाके सरकारसे जन भावना अनुसार काम करे नाइ सेकल उल्लेख करटी नेकपामे मतदान करुइया जनतानमे हिनताबोध हुइल ओ रगतके आँशु बहैटी रहल समेत बटैलै ।
औरे प्रशंगमे नेता बलायर नेकपा भिट्टरके अब्बे सैद्धान्तिक बिवाद नाइ होके कम्युनिष्ट सत्ता पैना ओ नाइ पैना बिचके झगडा रहल ओरसे यी समस्या सामाधान नाइ हुइल उहाँके कहाइ रहे । काँग्रेस देश चलाइबर देश डुबल कना आरोपके खण्डन करटी नेता बलायलर नेकपाके सरकार टे कुछ बरसमे देश खोक्रो बनासेकल दाबी करलै ।
काँग्रेससे अब्बेसम जिम्मेवार होके देश हाकल उहाँके कहाइ रहे । बिगत सम्झैटी उहाँ काँग्रेस जिम्मेवार पार्टी रहल बटैटी आपन पार्टीसे संबिधान जारी कैके कार्यान्वयन करल बटैलै । जनता काँग्रेसहे प्रतिपक्षमे पाँच बरस बैठक लाग जनादेश डेहल ओरसे काँग्रेस प्रतिपक्षमे बैठ्ना समेत दाबी करलै । मने, बर्तमान सरकारहे सचेत कराइ पर्ना काँग्रेसके कर्तव्य रहल उहाँ कहलै ।
औरे प्रशंगमे सत्तारुढ दल नेपाल कम्युनिस्ट पार्टी नेकपासे नेतृत्व करल सरकार भ्रष्ट्राचार ओ अनियमिततामे व्याप्त रहल आरोप लगैलै । सरकारसे आपन जिम्मेवारी पुरा नाइ करल समेत ओहकान आरोप रहल बा । उहाँ सरकारहे घरी घरी जिम्मेवारी बोध करैना बाध्य हुइल बटैलै ।
नेकपा दुई तिहाइ पाके सरकार सञ्चालन करलेसे फेन अब्बे नेपाली काँग्रेसहे गुहार माग्न बाध्य हुइल उहाँ बटैलै । मने, कम्युनिष्ट पार्टीके सरकार ओ आन्तरिक राजनीतिमे नेपाली काँग्रेसके कौनो दखल नाइ रहल उहाँ स्पष्ट परलै ।
उहाँ वर्तमान सरकार आभिन फेन दम्भके आधारमे चल्टी रहल आरोप समेत लगैलै । उहाँ कहलै, ‘कम्युनिष्ट सरकारके जनता ओ देश प्रतिके समर्पणके भाव शंकास्पद बा उहाँहुक्रे व्यक्तिगत दम्भके कारण फुटल बाटै ।’ वर्तमान सरकार, कम्युनिष्ट पार्टीके रवैया ओ नेपाली काँग्रेसके महाधिवेशनहे केन्द्रित पारके जनताके बिचमे जैटी रहल बटैलै ।
