परीक्षा केन्द्रके अनुगमन
पहुरा समाचारदाता
धनगढी, ११ अगहन । धनगढी उपमहानगरपालिकाके नगरप्रमुख नृपबहादुर वड ओ उप–प्रमुख सुशीला मिश्रभट्टसे चल्टी रहल कक्षा १२ के वार्षिक परीक्षा केन्द्रके अनुगमन करले बाटै ।
नगरप्रमुख वड धनगढीके पञ्चोदय माध्यमिक विद्यालय ओ वासुदेवी माध्यमिक विद्यालयमे परीक्षा केन्द्र अनुगमन करल हुइट । ओस्टेक करके उप–प्मुख सुशीला मिश्र भट्ट धनगढीके धनगढी नमुना मावि, त्रिनगर मावि ओ तुलसीराम मावि परीक्षा केन्द्रके अनुगमन करल हुइट ।
अनुगमनके क्रममे नगरप्रमुख ओ उप–प्रमुखसे विद्यार्थीनके स्वास्थ्य सुरक्षाहे ख्याल करके मर्यादित तरिकासे परीक्षा संचालन कैना निर्देशनफे डेले रहिट ।
नगरप्रमुख वडसे कोरोना महामारीके विचमे परीक्षा संचालन हुइटी रहल ओरसे विद्यार्थीहुकनके स्वास्थ्य सुरक्षाहे ख्याल करके मर्यादीत तरीकासे परीक्षा संचालन कैना निर्देशन डेलै । ओस्टेक करके उप–प्रमुख भट्टसे कोरोना माहामारीके विच परीक्षा संचालन करेबेरके व्यवस्थापकीय समस्याके बारेके केन्द्राध्यक्षहुकनसे बुझल रहिट ।
केन्द्राध्यक्षहुक्रे राष्ट्रिय परीक्षाबोर्डसे समयमे प्रश्नपत्र नइपाके समस्या हुइटी रहल गुनासो करले रहिट । त्रिनगर माध्यमिक विद्यालयके प्रअ भूपाल सिंह खड्का समयमे राष्ट्रिय परीक्षाबोर्डसे प्रश्नपत्र नइपुगेबेर ठोरिक कठिनाई हुइल बटैलै ।
