सुदूरपश्चिममे ४१ जनहनमे कोरोना संक्रमण पुष्टि
पहुरा समाचारदाता
धनगढी, ११ अगहन । सेती प्रादेशिक अस्पताल प्रयोगशालामे थप ४१ जनहनमे कोराना संक्रमण पुष्टि हुइल बा ।
पाछेक २४ घण्टामे १३३ जनहनके परीक्षण करेबर थप ४१ जनहनमे कोराना संक्रमण पुष्टि हुइल अस्पतालके सूचना अधिकारी दिलिपकुमार श्रेष्ठ जानकारी डेलै ।
संक्रमण पुष्टि हुउइयामे उपमहानगरपालिकाके वडा नम्बर २ के ११ जाने, वडा नम्बर १ के ४ जाने, वडा नम्बर ८ के ३ जाने, वडा नम्बर ३ ओ ५ के २/२ जाने, ओस्टके वडा नम्बर ४ ओ १३ के १/१ जनहनमे संक्रमण डेखल जानकारी डेलै । ओस्टके कैलालीके गोदावरीके ४ जाने ओ गोदावरी ओ बेलडाडीके एकएक जनहनमे फेन संक्रमण पुष्टि हुइल बा ।
कञ्चनपुरके बेलडाडीके ४ जाने, भिमदत्तके ५ जाने, बझाङ ओ बैतडीके एकएक जनहनमे फेन संक्रमण पुष्टि हुइल अस्पताल जनैले बा ।
देशभर थप १६ सय जनहनमे कोरोना संक्रमण, २३ के ज्यान गैल
पाछेक २४ घन्टामे नेपालमे थप १६ सय १४ जनहनमे कोरोना संक्रमण पुष्टि हुइल स्वास्थ्य तथा जनसंख्या मन्त्रालय जनैले बा ।
मन्त्रालयके अनुसार बिफेक रोज लावा थपल कोरोनाके संक्रमितसँगे नेपालमे कोरोना संक्रमितके संख्या २ लाख २७ हजार ६ सय ४० पुगल बा । ओस्टके पाछेक २४ घन्टामे कोरोनामुक्त होके १४ सय ३७ जाने डिस्चार्ज हुइल बाटै । नेपालमे हालसम्म कोरोनामुक्त हुउइयाके संख्या २ लाख ९ हजार ४ सय ३५ जाने पुगल बा । यी संगे नेपालमे सक्रिय संक्रमितके संख्या १६ हजार ७ सय ९३ पुगल बा ।
ओस्टके पाछेक २४ घन्टामे नेपालमे थप २३ जनहनके कोरोना संक्रमणसे मृत्यु हुइल स्वास्थ्य तथा जनसंख्या मन्त्रालय जनैले बा । यी संगे नेपालमे कोरोना संक्रमणसे मृत्यु हुउइयाके संख्या १४ सय १२ पुगल बा ।
