कैलारीमे पोषण तथा उत्थानशील जीविकोपार्जन परियोजना लागु

पहुरा समाचारदाता
हसुलिया, १६ अगहन । कैलारी गाउँपालिकामे पोषण तथा उत्थानशील जीविकोपार्जन परियोजना लागु हुइल बा । गाउँपालिका अध्यक्ष लाजुराम चौधरीके वडका पहुनामे सोम्मारके रोज हसुलियामे हुइल नगर÷गाउँपालिका स्तरीय बैठकमे उ परियोजना लागु जानकारी डेगिल हो ।

वल्र्ड भिजनके सहयोगमे दिगो विकास समाज ओ बाल कल्याण संघसे पाँच बर्षके लाग कैलारी गाउँपालिका वडा नम्बर ८ मे परियोजना लागु करे लागल परियोजना संयोजक सन्तराम चौधरी बटैलै । परियोजना अन्तर्गत बार्षिक रुपमे कैना गतिविधिबारे जानकारी डेटी उहाँ पोषण सुधारके लाग आर्थिक सुधार कार्यक्रम कैना, स्थानीय स्तरमे पैना पोषिलो खाद्य वस्तुके पहिचान करके प्रोत्साहन प्रवद्र्धन कैना, छोट किसानहे सहयोग, कृषि बाहेक आयमुलक सीपमुलक कार्यक्रममेफे सहयोग जनैलै ।

ओस्टेक बाल कल्याण संघके शिक्षा परियोजना फिल्ड अफिसर कल्पना चौधरी वाल कल्याण संघसे कैजिना गतिविधिबारे जानकारी डेहल रहिट । संघसे रुपान्तरण कक्षा संचालन कैना, विद्यालयमे आधारित वाल क्लव गठन, बाल अधिकार, बालबालिकाहुकनके सवाल ओ बाल संरक्षणके सेवाके बारेमे संरक्षकहे अभिमुखीकरण, परम्परागत हानीकारक अभ्यास न्यूनिकरण कार्यक्रम, कोभिड–१९ से प्रभावित परिवार तथा बालबालिका पहिचान करके खाद्यन्न सहयोग, बालमैत्री स्थानीय शासन अवलम्बनके प्रक्रियामे आवश्यक लगानी योजना निर्माणके लाग तथ्याङक संकलन तथा प्रकाशनमे सहगोग कैना जनागिल बा । कैलारी गाउँपालिका वडा नम्बर ८ के अध्यक्ष दुखीराम कठरिया अपन वडामे परियोजना लागु कैडेलकमे धन्यबाद डेटी परियोजनाहे लक्षित वर्गसम पुगैना आग्रह करल रहिट ।

नगर÷गाउँपालिका स्तरीय परियोजना बैठक दिगो विकास समाज भजनीके अध्यक्ष रामबहादुर सुनारके अध्यक्षतामे हुइल कार्यक्रममे कैलारी गाउँपालिकाके कृषि शाखा प्रमुख दिपक बहादुर खडका, पशु शाखा प्रमुख सुर्य प्रसाद चौधरी लगायत टमान सरोकारवाला निकायके सहभागिता रहल रहे । कार्यक्रमके संचालन दिगो विकास समाजके फिल्ड सहजकर्ता मुकेश चौधरी करले रहिट ।