सुदूरपश्चिममे ७३ संक्रमित ठप्लै
पहुरा समाचारदाता
धनगढी, २० अगहन । सुदूरपश्चिम प्रदेशमे ७३ जाने कोरोना भाइरस संक्रमित ठपल बाटै । पछिल्का २४ घण्टामे टमान प्रयोगशालामे करल परिक्षणसे ७३ जनहनमे संक्रमण पुष्टि हुइल सामाजिक विकास मन्त्रालय जनैले बा ।
लौव संक्रमितमे कैलालीके २१, कञ्चनपुरके ६, अछामके ३१, बैतडीके १, बझाङ २, डडेल्धुराके ४, दार्चुला ३, डोटी २ ओ अन्य ३ जाने रहल जनागिल बा ।
सुदूरपश्चिम प्रदेशमे संक्रमितके संख्या ११ हजार ६ सय ३६ जाने रहलमे ९ हजार ६ सय ३२ कोरोना रोगसे मुक्त हुइल ओ सक्रिया संक्रमितके संख्या १९ सय ६३ जाने रहल बाटै । अभिनसम १ लाख २१ हजार १४ जानेक स्वाब संकलन करलमे १ लाख २० हजार ५ सय ५४ स्वाबके परिक्षण करेबेर १ लाख ८ हजार ९ सय १८ नमूना निगेटिभ आइल रहे । प्रदेशमे कोभिड–१९ संक्रमित ४१ जानेक ज्यान गैल बा ।
ओस्टेक पछिल्का २४ घण्टामे देशभर १०२४ जानेक कोरोनाभाइरस संक्रमण पुष्टि हुइल बा । संक्रमितमे ४०२ महिला ओ ६२२ पुरुष रहल बा ।
स्वास्थ्य तथा जनसंख्या मन्त्रालयके अन्सार बिटल २४ घण्टामे देशभर २२०६ जाने ठिक हुइल बाटै कलेसे १० जानेक मृत्यु हुइल बा । उ बीचमे ६ हजार ७४ जानेक कोरोना परीक्षण हुइल रहे ।
