सामाजिक अभियानके लाग फाउन्डेशनके स्थापना

पहुरा समाचारदाता
धनगढी, २१ अगहन । थारु समुदायमे सामाजिक अभियान संचालन करेक लाग हमार फाउन्डेशनके स्थापना कैगिल बा ।

गरीब तथा जेहेन्दार छात्र छात्राहुकनके उच्च शिक्षामे सहयोग कैना, सहयोगी हातहे संगठित कैना, थारु समुदायके यूवाहुकनहे सरकारी तथा नीजि संस्थामे सेवा प्रवेशके लाग सहयोग कैना, थारु यूवाहुकनहे उद्यमशिलता विकास सम्बन्धी तालिम तथा अभिमुखीकरण करटी स्वरोजगारी श्रृजना कैना, थारु समुदायके प्रत्येक घरहे व्यावसायिक बनैना उद्देश्यसे हमार फाउन्डेशनके स्थापना करल अध्यक्ष रामदास चौधरी बटैलै ।

हमार फाउन्डेशन संस्थाके अवधारणाके सुरुवाट २०७५ माघ २६ गते हुके तर्दथ समितिके चयन हुइल रहे । कलेसे कम्पनी रजिष्टार कार्यालयमे यिहे २०७७ कुवाँर २८ गते विधिवट दर्ता हुइल बा ।

फाउन्डेशनमे अब्बे २६ जाने सस्ंथापक सदस्य रहल बटैं । ओम्ने सामाजिक विकास क्षेत्रमे नम्मा अनुभव रहुइयाके अवद्धता, सामाजिक तथा राजनीतिक रुपमे सक्रिय हुके समाजमे कुछ करे परठ कहुइयाके संलग्नता, व्यवस्थापनमे मजा दखल रहुइयाके सहभागिता, प्राविधिक रुपमे सक्षमता, कुछ करे परठ कना भावना रहुइया, सामाज परिवर्तनके संवाहकहुकनके जमात, यूवा तथा परिपक्क विचके समायोजन रहल बा ।

अगामी दिनके फाउन्डेशनके लक्ष्य संस्थापक सदस्य २ सय, आजीवन सदस्य ५ सय, साधारण सदस्य एक हजार, कोष संकलन एक करोड, कोषके वार्षिक ब्याज दस लाख, सन २०२२ सम १५ सय आजीवन सदस्य, साधारण सदस्य १५ सय पुगैना रहल बा । ओस्टेक सस्थाके सहयोग तथा सहकार्यमे ५ जाने यूवा प्रत्येक वर्ष सरकारी जागिर प्रवेश कैना, ५० विद्यार्थी स्नातक तह पास कैना, २० जाने स्नातकोत्तर पास कैना ओ १०० जाने यूवा प्रत्येक वर्ष स्वरोजगार सुरु कैना अध्यक्ष रामदास बटैलै ।

फाउन्डेशनके कोष व्यवस्थापनमे साधारण सदस्यता शुल्क एक हजार, संस्थापक सदस्य शुल्क २० हजार, आजीवन सदस्यता शुल्क १० हजार, कार्य समितिके पदावधीः ४ वर्ष, अध्यक्षके कार्यअवधीः लगातार २ अवधिसम केल तोकल बा । शनिच्चरके रोज धनगढीमे हुइल पहिल साधारणसभामे एक बरसभिटर तोकल शुल्क तिरके फाउन्डेशनके सस्थापक सदस्य बने सेक्ना निर्णयफे हुइल बा ।

संस्थासे हालसम्मके प्रयास बर्दिया, बाँके, दाङ ओ काठमाण्डौमे छलफल जारी राखल, अस्ट्रेलिया अमेरिका, जपान औ और देशमे बसोवास कैना नेपालीहुकनसंग दान, चन्दा सहयोगके लाग छललफल जारी, दातृ निकायमे छलफल सुरु, राष्ट्रिय स्तरके संजालमे आवद्धताके पहल कैगिल अध्यक्ष जनैलै ।

काम कैना प्रक्रिया

इच्छुक व्यक्तिहुकनहे फाउन्डेशनमे सहयोग कैना प्रोत्सहित कैना, सेकटसम ढेरसे ढेरहे यी विचार सूचना सम्पे्रशन कैना, फाउन्डेशनमे सहयोग कैना गर्न उत्साहित आहवान कैना, आवश्यक छात्र छात्राहे सहयोग कैना, संस्थापक सदस्य, आजिवन सदस्य, साधारण सदस्य, सदस्यसे कोषके व्यवस्था कैना, अक्ष्यकोषके स्थापना कैना, सरकारी संघ संस्था तथा नीजि संस्थासे दान तथा चन्दा संकलन कैना, सहयोगके लाग आवश्यक छात्र छात्राहुकनके नाम संकलन कैना, ज्ञान दाताहुकनके रोस्टर तयार कैना रहल जनागिल बा ।

अध्यक्षसे सस्थाके सगठनिक प्रतिवेदन प्रस्तुत करटी प्रारम्भिक कक्षा पह्राई पुरा कैना दर ७५ प्रतिशत (२०७०), कक्षा ८ पुरा कैना दर ६९.४ प्रतिशत (२०७०) कम प्रतिशत विद्यार्थी कक्षा १२ पास कैना, थारु समुदायके विद्यार्थीहुकनके विद्यालय छोरना दर आउर ढेर रहल बटैलै । प्रस्तुत प्रतिवेदनमे बहुट कम थारु विद्यार्थी स्नातक उतीर्ण करठै उ मन्से बहुट कम विद्यार्थी स्नातकोत्तर उतीर्ण करना, ओम्नेसे एक प्रतिशतसे कम सरकारी तथा गैरसरकारी क्षेत्रमे जागिर पैना विद्यालय छोरल मन्से ढेर जानेक आर्थिक स्थिति कम्जोर रहल ओरसे वा सहयोगी हातके कमीके कारणसे पढाई छोरल उल्लेख बा ।

उहाँ कहलै, ‘३४ प्रतिशत सुदूरपश्चिमी जनता गरिबीके रेखा टरे बटंै, ओम्ने ढेर थारु समुदायफे परठै ।’ तराईमे बसाई सराईके दर तीब्र हुके खेती योग्य जमिन टुक्रना क्रमफे ओटरे तिब्र बा, दिनप्रतिदिन थारुहुक्रे जमिनसे बेदखल हुइटी रहल उहाँ जनैलै । थारुहुक्रे जिविकोपार्जन तरीकाके कृषि पेशामे आधारित बटै मने फर्म दर्ता नइकरल करल अनुदानसे बञ्चित हुइल अध्यक्ष बटैलै ।

‘छोटभारी करके प्रत्येक दिनहस लौव पसल खुलल मने उहीहे हेरना हो कलेसे गैरथारुके संख्या ढेर बा, थारु समुदायके लउण्डा लउण्डी अपन जीवनके सुरुवाट दुसरके पसलमे सुरुवाट करटी पह्राई छोरटी रहल उहाँक कहाई बा ।’ बहुट कम थारु अपन व्यवसाय सुरुवाट करना मने मने टिकाई नइसेक्नाफे अध्यक्ष जनैलै ।

संस्थाके कोषाध्यक्ष विजय चौधरी प्रगति प्रतिवेदन सुनैटी कोषमे ५ लाख ५५ हजार ६ सय ६७ रुप्या जमा हुइल जनैलै । कार्यक्रमके संचालन तथा संस्थाके परिचय सचिव ठाकुर प्रसाद करिया प्रधान डेहल रहिट ।

यिहीसे आघे हमार फाउन्डेशनके पहिल साधारण सभा संरक्षक प्रभातकुमार चौधरी वडका पहुनामे हुइल रहे । थारु समुदाय आवसे परिमार्जनके हुके जैना आवश्यक रहल बटैलै । फाउन्डेशन गरिबीके रेखाटरे रहल विद्यार्थीनहे पह्राईके सहयोग करी कना आश लेहल उहाँ कहलै । कार्यक्रममे उहाँ राज्य पक्षहे दवाव सृजना करलेसे केल अधिकार सुनिश्चित हुइना बटैलै ।

संस्थाके सल्लाहकार गुरुप्रसाद चौधरी हमार फाउन्डेशन सेवामुलक नाफा रहिट सस्था हुइल ओरसे यम्ने समस्त थारु समुदायके अगुवाहुकन समेटना जरुरी रहल बटैलै । यूवा नेता पुरन प्रसाद चौधरी संस्थाहे आघेक बह्राइक लाग टिम सक्रिय हुई पर्ना बटैलै । उहाँ कहलै, ‘थारु–थारुनसे भेदभाव ओ दमन हुइल ओरसे फाउन्डेशन सचेतना जगैना जरुरीफे बा ।’

अधिवक्त जोहारीलाल चौधरी हमार फाउन्डेशन औपचारिक रुपमे दर्ता हुइल ओरसे थारु समुदायमे ऐतिहासिक रहल बटैलै । उहाँ कहलै, ‘फाउन्डेशनहे रणनैतिक, उदाहरणीय तरिकासे आघे बह्रैना जरुरी बा, यिहीसे थारु समुदायके भविष्यसे सुनिश्चितफे करे सेक्जाई ।’ अधिवक्ता नाथुराम कठरिया(महतो) संस्था सेवा, परोपकारके भावनासे स्थापित हुइल हो । उहाँ कहलै, समाजमे ढेर मने दान, सहयोग कैना इच्छा जाहेर करठै, मने ओकर सदुपयोग हुइल की नई कना ओइनहे लग्ठीन टबमारे हमार फाउन्डेशन उद्देश्य अन्सार आघे बह्रके डेखैना जरुरी रहल बा ।’

संस्थाके सल्लाहकार माधव चौधरी फाउन्डेशनके उद्देश्य अन्सार आघे बह्रलेसे पाछे परल थारु समुदायहे राज्यके मुलधारमे नानेक लाग सहयोग कैना बटैलै । यूवा अभियन्ता राजाराम चौधरी दातृ निकायसे सम्पर्क करलेसे संस्थाहे आघे बह्राइक सेक्ना बटैलै । सरिता चौधरी समाज परिवर्तनसंगे मानसिकता परिवर्तन हुइ पर्ना जरुरी रहल बटैलै ।

हमार फाउन्डेशनके अध्यक्ष रामदास

हमार फाउन्डेशनके पहिल साधारण सभासे रामदास चौधरीके नेतृत्वमे नौ सदस्यीय लौवा कार्यसमिति चयन कैगिल बा ।

शनिच्चरके रोज धनगढीमे हुइल फाउन्डेशनके पहिल साधारणसभासे लौव कार्यससमिति चयन हुइल हो । समितिके सचिवमे ठाकुरप्रसाद करियाप्रधान, कोषाध्यक्षमे विजय चौधरी रहल बटैं ।

ओस्टेक सदस्यमे जोहारी लाल चौधरी, कैलाश करिया, महेश चौधरी, लक्ष्मण चौधरी, मीनाकुमारी चौधरी, ओ अन्जु चौधरी रहल बटैं । फाउन्डेशनके कार्यसमिति चयन निर्वाचन प्रक्रिया पुगा कैगिल निर्वाचन मण्डलके अधिकृत नाथुराम कठरिया (महतो) जनैलै ।

ओस्टेक फाउन्डेशनके संंरक्षकमे प्रभातकुमार चौधरी रहल बटैं । यिहीसे आघे फाउन्डेशनके तदर्थ समिति चयन हुईबेर सल्लाहकारमे कृष्णकुमार चौधरी, दिलबहादुर चौधरी, गुरु प्रसाद चौधरी, विरबहादुर चौधरी, माधव चौधरीहे धारगिल रहे ।