महोत्सव संचालन करे पैना माग
पहुुरा समाचारदाता
धनगढी, २१ अगहन । कैलाली उद्योग वाणिज्य संघसे सुदूरपश्चिम महोत्सव संचालन करे पाई पर्ना माग करले बा ।
अँटवारके रोज धनगढीमे कैगिल पत्रकार सम्मेलनमे संघके अध्यक्ष पुष्पराज कुँवर उ धारणा राखल रहिट । उहाँ कहलै, ‘अब्बे ढेर व्यापार व्यवसाय खुलल अवस्था, शैक्षिक संस्था खुलसेकल, सरकारी कार्यक्रम हुइटी रहल, धार्मिक कार्यक्रम हुइटी रहल ओरसे हाली संघसेफे महोत्सव आयोजना कैना अनुमति पाई परल ।’
सुदूरपश्चिम प्रदेशके पर्यटन, कृषि ओ उद्योग व्यापारके विकास तथा विस्तारके साथे संस्कृति, कलाके प्रवद्र्धन करटी यी क्षेत्रके समग्र विकासके सम्भावनाहे उजागर कैना उद्देश्यसे कैलाली उद्योग वाणिज्य संघसे २०६३ सालसे धनगढीमे महोत्सवके करटी आइल बा ।
यी बरस यिहे अगहन २२ गतेसे पुस २ गतेसम समृद्ध सुदूरपश्चिमके लागः आर्थिक समृद्धि कना मुल नाराके साथ धनगढीके संघीय प्रहरी इकाई कार्यालयके मैदानमे आयोजना हुइना कहल महोत्सव विश्वव्यापी महामारीके रुपमे फैलल कोरोना भाइरसके कारण क्यालेण्डरमे कहल मितिमे करे नाइसेकल पत्रकार सम्मेलनमे अध्यक्ष कुँवर जानकारी डेलै ।
कोभिडसे शिथिल हुइल व्यापार व्यवसाय, छोट ओ भारी व्यावसाय, रोजगार गुमके स्वदेश लौटल यूवासे उत्पादन करल वस्तुके प्रवद्र्धनके लाग महोत्सव मजा ठाउँ रहल ओरसे महोत्सव संचालन करे पाई पर्ना माग करल उहाँ कहलै । अध्यक्ष कुँवर महोत्सव निर्धारित समयमे हुइ नइसेक्लेसेफे हाली छलफल करके यी बरसके महोत्सव माघ या फागुनसम कैना बटैलै ।
पत्रकार सम्मेलनमे संघके महासचिव ओम विष्ट थला परल व्यापार व्यावसायहे चलयमान बनैना महोत्सव आवश्यक रहल कहटी आयोजना हुई पैना माग करल बटैलै ।
