लैङिक हिंसा न्यूनीकरण घरसे सुरुवात करीः उपप्रमुख कठरिया
इस्मिता कुश्मी
जोशीपुर, २२ अगहन । जोशीपुर गाउँपालिकाके उपप्रमुख गीताकुमारी कठरिया लैङिक हिंसा अन्त्य सबसे पहिले अपन घरसे सुरुवात कैना आग्रह करले बाटी ।
महिला हिंसा विरुद्धके १६ दिने अभियान अन्तर्गत लैङिक तथा महिला हिंसा न्यूनीकरण ओ सेवासुविधामे पहुँच पुगाइक लाग जोशीपुर गाउँपालिकामे अँटवारके रोज ध्यानाकर्षणपत्र बुझटी उहाँ कहटी लैङिक हिंसाके घटना घरे सुरुवाट हुइल बटैलै ।
उहाँ कहली, ढेर जैसिन हिंसा घरपरिवारसे सुरुवाट हुइठ, हिंसाके घटना न्यूनिकरण पहिले अपने सुरुवाट करी, टब समाजमे करे सेक्जाई ।
जोशीपुर गाउँपालिका लैङिक हिंसा न्यूनीकरणके लाग कार्यक्रम करटी रहल उपप्रमुख कठरिया कहली । वडा स्तरीय महिला विकास संजाल, सौगात महिला समूह, कोपिला महिला कृषक समूह, जनसिजन महिला कृषक समूह, जागरण महिला कृषक समूह ओ ज्योति महिला कृषक समूहसे सात बुँदे माग सहित ध्यानाकर्षणपत्र बुझाइल रहिट ।
लुथरन विश्व फेडरेशन नेपाल ओ दिगो विकास समाज भजनीसे संचालित ग्रामीण महिला सशक्तीकरण तथा अधिकार प्रवर्द्धन परियोजना अन्तर्गत उ ध्यानाकर्षणत्र बुझागिल हो । ज्ञापनपत्र गाउँपालिका उपाध्यक्ष गीता कठरिया ओ गाउँपालिकाके महिला तथा बालबालिका शाखा सहायक पाँचौ बबिता ढकालसे बुझागिल रहे ।
ध्यानाकर्षणपत्रमे लैङिक हिंसाके घटनाहे निर्मूलीकरण कैना सामाजिक सुरक्षाके सुनिश्चिताके प्रत्यभुतिके लाग आवश्यक प्रबन्ध मिलाई पर्ना, यौन हिंसामे परल पीडितहे न्याय ओ पीडकहे कारवाही करे पर्ना, महिला दिदीबाबूके आर्थिक तथा सामाजिक सशक्तीकरणके लाग पालिकासे टमान कार्यक्रम संचालन करे पर्ना माग करल बा । ध्यानाकर्षणपत्र बुझैना कार्यक्रममे २० जानेक सहभागिता रहे ।
