पश्चिम सेती निर्माणके माग कैटी ७५० डोका प्रदर्शन
पहुरा समाचारदाता
धनगढी, २२ अगहन । पश्चिम सेती निर्माणके माग कैटी बैतडीमे बोलन्या थली नामक संस्थासे ‘सपनाके ७५० डोका’ प्रदर्शन करले बा ।
७५० मेगावाटके पश्चिम सेती जलविद्युत आयोजनाके कार्यान्वयनमे ढिलाइ करटी रहल कहटी सोम्मारके विरोध स्वरूप ७५० डोका प्रदर्शन करल हो ।
बैतडीके ढुंगाड ओ डोटीके तलाराके बीचमे रहल उ स्थानमे सपनाके डोका प्रदर्शन करल बोलन्या थलीके संयोजक यादव जोशी बटैलै ।
उ स्थानमे डडेल्धुरा, डोटी ओ बैतडीसे डोकासहित स्थानीय प्रदर्शनमे आइल रहिट । कार्यक्रममे बोल्टी संयोजक जोशीसे राज्यसे पश्चिम सेतीहे विभेद करल आरोप लगैलै । उहाँ कहलै, ‘आब फेन राज्यसे पश्चिम सेती निर्माणहे चासो नाइ डि कलेसे लडाकु दस्ता तयार पारके संघर्ष करब ।’
बोलन्या थलीसे पश्चिम सेतीके लाग यिहीसे आघे फेन टमान दबाबमूलक कार्यक्रम करटी आइल रहे । माइतीघर मण्डलामे कचौरा जुलुस, सुदूरपश्चिमसे संघीय संसदमे प्रतिनिधित्व करुइया १३ सांसदसे छलफल, संगीत संघर्ष कार्यक्रम करसेकल बा । बोलन्या थलीसे सरकारके खोजीके लाग कहटी डोटीमे दिनके टुकी बारके प्रदर्शन फेन करल रहे ।
पश्चिम सेती निर्माणमे ढिलाइ हुइटी रहल कहटी सेती पुलउपर सात सय ५० टुकी बारके सरकारके सांकेतिक विरोध करल बोलन्या थली यी बेर ‘सपनाके ७५० डोका’ प्रदर्शन कैके आन्दोलन करल हो ।
