वडा कार्यालय भवनके सिलान्यास
पहुरा समाचारदाता
धनगढी, २४ अगहन । धनगढी उपमहानगरपालिकाके १९ ठो वडा मन्से १६ ठो अपने वडा कार्यालय भवन निर्माण करल बा ।
उपमहानगरपालिकासे मंगर वडा नम्बर १४ के वडा कार्यालयके सिलान्यास करलसंगे अपने वडा कार्यालय भवन हुइना वडाके संख्या १६ पुगल हो । धनगढीके नगरप्रमुख नृपबहादुर वड ओ उप प्रमुख सुशीला मिश्र भट्ट वडा नम्बर १४ के वडा कार्यालयके शिलान्यास करल हुइट ।
नगरप्रमुख नृपबहादुर वडके अन्सार निर्माण हुइना वडा नम्बर १६, १३, १२, १९ के वडा कार्यालय निर्माण सम्पन्न हुके अपने भवनसे वडा कार्यालय संचालन हुसेकल बा । ओस्टेक करके वडा नम्बर ९ के निर्माण सम्पन्न हुके हस्तान्तरणके चरणमे रहल बा ।
नगरप्रमुख वड कहलै, वडा नम्बर १५, १८ के पुराने गाविस भवन रहल ओरसे ओम्ने पुनःमर्मत करके संचालन करले बाटी ।
वडा नम्बर १, २ ओ ४ बाहेक और वडाके वडा कार्यालय भवन निर्माणाधिन अवस्थामे रहल नगरप्रमुख वड बटैलै । उहाँ कहलै, बाँकी रहल ३ ठो वडाहुकनके फे जग्गाके टुंगो लग्टी एक्के एक्के चरणमे टेन्डर कैजाई । नगरप्रमुख वड अपनेहुकनके कार्यकालमे सक्कु वडा कार्यालयहुक्रे निर्माण करसेक्ना योजना रहल बटैलै ।
नगर उपप्रमुख सुशीला मिश्र भट्ट वडा कार्यालय भवन निर्माण हुइलसंगे सेवाग्राही ओ सेवा प्रदायी दुनु पक्षहे सहजुल हुइना बटैली । उहाँ कहली, निर्धारित समयमे भवन निर्माणके काम सम्पन्न कैना निर्माण कम्पनीसंग अनुरोध करटी ।
