सहिद गेट–क्याम्पसराेड सडकके शिलान्यास
पहुरा समाचारदाता
धनगढी, २५ अगहन । बहुप्रतिक्षित क्षेत्रीय शहरी विकास आयोजना अन्तर्गतके सडकके निर्माण कार्य विफेसे धनगढीमे सुरु हुइल बा ।
धनगढी उपमहानगरपालिकाके नगरप्रमुख नृपबहादुर वड ओ उपप्रमुख सुशीला मिश्र भट्ट सहिद गेट–क्याम्पसराेड सडकके शिलान्यास करलसंगे सडक निर्माणके काम आघे बह्रल हो । एसियाली विकास बैंकके सहयोगमे संचालन हुइटी रहल क्षेत्रीय शहरी विकास आयोजना अन्तर्गत धनगढी उपमहानगरपालिकामे ४२ किलोमिटर सडक विस्तारके लाग २०१५ मे सम्झौता हुइल रहे ।
सन् २०१५मे छुट्याइल एक अर्ब ३५ करोड रुप्या बजेट अपुग हुइना ओरसे सडक निर्माणके काम चरणवद्धरुपमे हुइना नगरप्रमुख वड बटैलै । पहिल चरणमे ६८ करोड ५ लाख ९८ हजार ७ सय ४ रुप्याके ठेक्का कालिका कन्ट्रक्सन पैले बा ।
धनगढी उपमहानगरपालिकाके उपप्रमुख सुशीला मिश्र भट्ट नगरके विकासके लाग नगरवासीसे हातेमालो करे पर्ना बटैली । क्षेत्रीय शहरी विकास आयोजना उपव्यवस्थापक श्याम चन्द्र बुढाथोकी समयमे काम निर्धारित समयमे काम सम्पन्न हुएनामे ढुक्क रहल बटैलै । सडक सिलन्यास कार्यक्रम धनगढी उपमहानगरपालिका वडा नम्बर ४ के अध्यक्ष दीपककुमार थापाके अध्यक्षतामे हुइल रहे ।
ठेक्का सम्झौता १२ जुलाई २०२० मे हुके २०२२ अगस्त ३ मे सडक बनसेक्ना कहल बा । सहिद गेट–क्याम्पसराेड सडकके चौडाई १६ मिटर ओ सडकके क्षेत्राअधिकार २२ मिटर रहल बा । कलेसे लम्बाई ३.६५ किलोमिटर रहल बा ।
