कैलारीमे विविध कार्यक्रम आयोजना कैटी उसरल

पहुरा समाचारदाता
हसुलिया, २५ अगहन । लैङ्गिक हिंसा विरुद्धके १६ दिने अभियान अन्र्तगत कैलारी गाउँपालिकामे विविध कार्यक्रम आयोजना कैटी उसरल बा ।

‘लैङ्गिक हिंसा अन्त्यके प्रतिबद्धता : व्यक्ति समाज ओ सबके ऐक्यबद्धता’ कना मूल नारासहित नोभेम्बर २५ से सुरु हुइल १६ दिने अभियान बिफेक रोज डिसेम्बर १० सम गाउँपालिका अन्र्तगत टमान गतिविधी सञ्चालन करटी उरसल हो ।

कैलारी गाउँपालिका महिला तथा बालबालिका शाखाके आयोजना ओ गाउँपालिका अन्र्तगत क्रियाशिल सहकारी संस्था एवं गैह्सरकारी संस्थाके सहकार्यमे सुरु हुइल अभियान अन्र्तगत पहिल दिन टमान सन्देशमूलक प्लेकार्ड सहितके ¥यालीके उद्घाटन पश्चात हसुलिया बजार परिक्रमा करल रहे । कार्यक्रमके उद्घाटन गाउँपालिके अध्यक्ष लाजुराम चौधरी ओ उपाध्यक्ष लक्ष्मी सत्गौंवा थारु करल रहिट ।

उ अभियान अन्र्तगत हरेक दिन टमान मेरके महिला हिंसा न्यूनीकरण सम्बन्धी अभिमुखीकरण, अन्तरक्रिया लगायतके कार्यक्रम हुइल रहे । उहे कार्यक्रम अन्र्तगत हिंसा पीडित महिलाहुक्रनहे कानुनी उपचारबारे एकदिने अभिमुखीकरण कार्यक्रम अधिवक्ता पुष्प विक्रम शाही प्रशिक्षण डेहल रहिट ।

अभियान कार्यक्रम अन्र्तगत ‘लैङ्गिक हिंसा अन्त्यके प्रतिबद्धता ः व्यक्ति समाज ओ सबके ऐक्यबद्धता’ कना शिर्षकमे मावि स्तरीय वक्तृत्वकला प्रतियोगिता हुइल रहे । प्रतियोगितामे ६ ठो माविके ८ जाने छात्रछात्रा सहभागिता जनाइल रहिट । जेम्ने राष्ट्रिय मावि बिचैपुरके मनोज चौधरी प्रथम, राष्ट्रिय मावि बिचैपुरके एलिजा चौधरी ओ जनकल्याण मावि पवेराके अंशु चौधरी द्धितीय हुइल रहिट कलेसे रामावि भुइयाँफाँटाके विक्रम साउँद तृतीय हुइल रहिट । उहाँहुक्रनहे शैक्षिक सामग्री कपी, कलम ओ डायरी लेके पुरस्कृत करल रहे ।

अभियान अन्र्तगतके अन्तिम दिन बिफेक रोज हसुलियामे महिलाहुक्रनके लाग म्युजिकल चियर प्रतियोगिता राखल रहे । जौन प्रतियोगितामे कैलारी १ के विनिता चौधरी प्रथम, वडा नं ७ के अनुषा चौधरी द्धितीय ओ हिरा चौधरी तृतीय हुइल रहिट ।

समापन कार्यक्रममे महिला तथा बालबालिका शाखा प्रमुख बालकुमारी चौधरी लैङ्गिक हिंसा विरुद्धके १६ दिने अभियानबारे जानकारी कराइल रही । ओस्टके कमैया प्रथा उन्मूलन समाजके कार्यक्रम संयोजक सुरज परियार अभियान अन्तर्गत हुइल सक्कु कार्यक्रमके समीक्षा करल रहिट ।

गाउँपालिकाके उपाध्यक्ष लक्ष्मी सत्गौंवा थारुके अध्यक्षतामे हुइल कार्यक्रममे सामाजिक विकास शाखा प्रमुख यगम कलेल, शिक्षा शाखा प्रमुख गणेश मिश्र लगायत मन्तब्य राखल रहिट । कार्यक्रमके सञ्चालन समीक्षा महिला विकास वहुउद्देश्यीय सहकारी संस्थाके अध्यक्ष उर्मिला चौधरी करल रहिट ।

अभियान सफल पारक लाग कमैया प्रथा उन्मूलन समाज, पारदर्शी महिला विकास वहुउद्देश्यीय संस्था, दलित महिला अधिकार मञ्च, बेश, नेपाल रेडक्रस सोसाइटी, सामाजिक सेवा अध्ययन केन्द्र, समीक्षा महिला विकास बहुउद्देश्यीय सहकारी संस्था, चेतनशील महिला विकास सहकारी संस्था लगायत सहकार्य करल रहे ।