आरडीआरसीके सामाजिक परीक्षण
पहुरा समाचारदाता
धनगढी, २८ अगहन । ग्राम विकास अनुसन्धान केन्द्र (आरडीआरसी) धनगढीके अँट्वारके रोज सामाजिक परीक्षण कार्यक्रम हुइल बा । संस्था आर्थिक वर्ष २०७६/०७७ मे करल गतिविधिके सामाजिक परीक्षण करल हो ।
आरडीआरसी सेसी सुशासन परियोजनाके सहयोगमे कैलालीके धनगढी उपमहानगरपालिका ओ कैलारी गाउँपालिकामे काम करटी आइल बा । स्थानीय सरकारहे प्रविधिमैत्री बनाके सुशासन कायम करना सहयोग पुगैना उद्देश्यके साथ दुनु पालिकामे काम करटी रहल जनैले बा ।
धनगढी उपमहानगरपालिकाके उपप्रमुख सुशीला मिश्र भट्ट उद्घाटन करले कार्यक्रम आरडीआरसीके अध्यक्ष दीर्घराज उपाध्यायके अध्यक्षतामे हुइल ।
कार्यक्रममे उपप्रमुख मिश्र आरडीआरसी स्थानीय सरकारहे ‘खुल्ला सरकार’ बने सिखाइल बटैली । यी संस्था स्थानीय सरकारहे सूचना ओ प्रविधित्तिरत्र छिरैना काम करल उहाँक कहाइ रहे । ‘यिहिसे जनप्रतिनिधिहे जवाफदेही बनैना ओ सुशासन कायम करना सहयोग पुगल बा,’ उहाँ कहली ।
कार्यक्रममे क्षेत्रीय निर्वाचन कार्यालयके प्रमुख प्रेमराज भट्ट सहयोगी सामाजिक संस्थाके काम कलेक स्थानीय सरकारहे घच्घच्वइटी रहना बटैलैं । उहाँ कहलैं, ‘उहिहे पूरा करना दायित्व ओ जिम्मेवारी स्थानीय सरकारके रहठ ।’
उहाँ स्थानीय सरकारहे जवाफदेही बनाइक लाग अन्तर्राष्ट्रिय एनजीओकेकिल भर नैपरना उल्लेख करटी कहलैं– ‘स्थानीय सरकार फेन अइसिन कार्यक्रमके लाग अपनत्व ग्रहण करके बजेट छुट्टयाइ परठ ।’ स्थानीय सरकारके डिजिटल पोर्टलमे कुछ सूचना ढिल करके अपडेट हुइल उहाँ गुनासो करलैं ।
अस्टेक, सेसी सुशासन परियोजनाके सुदूरश्चिम संयोजक महेन्द्र शाही सामाजिक संस्थाके जवाफदेहिताके महत्वपूर्ण औजार सामाजिक परीक्षण रहल बटैलैं । उहाँ सरकार करटीरहल काममे संघसंस्थाके साथ सहयोग रहे परना उल्लेख करलैं । ‘शासन सञ्चालनमे नागरिकके रचनात्मक सहयोग आवश्यक बा,’ उहाँ कहलैं ।
सुशासन परियोजनामार्फत आरडीआरसी चार वर्षसम कार्यक्रम करके सुशासनके काममे सहयोग हुइल ओ यिहिसे नीतिगत रुपमे फेन सकारात्मक प्रभाव पारल शाहीके कहाइ रहे ।
आरडीआरसीके अध्यक्ष उपाध्याय सेसी सुशासन परियोजनाके सहयोगमे विगत चार वर्षसे धनगढी उपमहानगरपालिका ओ कैलारी गाउँपालिकामे सूचना प्रविधिके क्षेत्रमे काम करल बटैलैं । उहाँ पाछेक समय गौरीगंगा नगरपालिकामे फेन सहयोग करल बटैलैं ।
कार्यक्रममे पत्रकार टेकेन्द्र देउवा आरडीआरसीसे करल कामके प्रगति प्रतिवेदन प्रस्तुत करले रहिट । कार्यक्रममे पत्रकार उन्नती चौधरी, युवा चन्द्र पनेरु लगायत मन्तव्य व्यक्त करले रहिट । कार्यक्रमके सहजीकरण सुशासन परियोजनाके जिल्ला संयोजक ठाकुरप्रसाद करियाप्रधान ओ सञ्चालन गोमा आचार्य करले रहि ।
आरडीआरसी परियोजना अन्तर्गत गिल आर्थिक वर्षमे ६९ लाख ९१ हजार रुप्याँ खर्च करले बा । अइना जनवरीसे परियोजनाके अवधि ओराइटा ।
